जुन्नर, ता. ८ : समर्थनगर- कुसूर (ता. जुन्नर) येथील श्री स्वामी समर्थ विसावा मंदिर येथे गुरुवारी (ता. १०) गुरुपौर्णिमा उत्सव मोठ्या उत्साहाने व भक्तिभावाने साजरी होणार आहे. यानिमित्ताने आयोजित विविध धार्मिक कार्यक्रमांना स्वामी भक्तांनी उपस्थित राहावे, असे आवाहन आयोजक तुकाराम महाराज दुराफे यांनी केले आहे. गुरुपौर्णिमेनिमित्त मंदिरात सकाळी भूपाळी आरती, श्री स्वामी समर्थ व श्री दत्त मुर्ती महाभिषेक व साईमाऊली पादुकापूजन यानंतर श्रींची पालखी सोहळा व औदुंबर प्रदक्षिणा होणार आहे. श्री मल्हारी कथा चरित्रकार डॉ. गजानन महाराज काळे यांचे गुरुपौर्णिमेनिमित्त प्रवचन होणार आहे. यानंतर सद्‍गुरू पाद्यपूजन व महाआरतीचे आयोजन केले आहे. श्री स्वामी समर्थ परिवाराने महाप्रसादाचे आयोजन केले आहे. दुपारी रामवाडी भजन मंडळ, कुसूर यांचा भजनाचा कार्यक्रम होईल. रात्री महाआरती व शेजारतीने उत्सवाची सांगता होईल.