जुन्नर, ता. ११ : गोवंश जातीचे कत्तल करण्यासाठी बांधून ठेवलेल्या पाच गाई व दोन बैल, अशा सात गोवंशाची सुटका जुन्नर पोलिसांनी केली. याबद्दल गोरक्षकांकडून पोलिसांचे अभिनंदन करण्यात आले.
याबाबत पोलिस अंमलदार दादाभाऊ पावडे यांनी फिर्याद दिली आहे. दोन ते पाच वर्षे वयाच्या गाई व बैल कोणीतरी अज्ञात व्यक्तीने कत्तल करण्याच्या हेतूने बांधून ठेवल्याचे आढळून आले. या सर्व गोवंशाची किंमत सुमारे एक लाख तेरा हजार रुपये असल्याचे फिर्यादीत नमूद केले आहे. जुन्नर येथील पणसुंबा पेठेतील जैन मंदिराशेजारील मोकळ्या जागेत गाई व बैलांच्या चारा पाण्याची व निवाऱ्याची व्यवस्था न करता त्यांना वेदना होईल, अशा स्थितीत बांधून ठेवले होते. त्यांची सुटका करून पांजरपोळ येथे रवानगी केली आहे. अज्ञात व्यक्तीच्या विरोधात पोलिसांनी प्राण्यांचा छळ प्रतिबंधक कायद्यानुसार दाखल केल्याचे पोलीस निरीक्षक किरण अवचर यांनी सांगितले.