जुन्नर, ता. ५ : शंकरराव बुट्टे पाटील यांचे कार्य समाजाला दिशादर्शक असून पुढील पिढीसाठी मार्गदर्शक आहे. विद्यार्थ्यांनी त्यांचा आदर्श घेऊन आयुष्याला आकार द्यावा असे प्रतिपादन मुंबई उच्च न्यायालयातील अधिवक्ता ॲड. मिलिंद देशमुख यांनी केले.
जुन्नर एज्युकेशन सोसायटी व अनाजी धोंडजी बुट्टे पाटील ट्रस्ट यांच्या वतीने बुट्टे पाटील विद्यालयात शंकरराव बुट्टे पाटील यांच्या ६० व्या पुण्यस्मरण दिनी (ता. २) आयोजित कार्यक्रमात ते बोलत होते. यावेळी ‘शंकरराव बुट्टे पाटील यांचे जीवन चरित्र व कार्य’ या विषयावरील वक्तृत्व स्पर्धेतील विजयी स्पर्धक अनया ढोबळे, सई ससाणे, शिवानी इंगवले, सावरी डामसे, इशिका हांडे यांना रोख पारितोषिक देऊन गौरविण्यात आले. यावेळी संस्थेचे अध्यक्ष ॲड. सुधीर ढोबळे, ट्रस्टचे विश्वस्त, पदाधिकारी, शिक्षक व विद्यार्थी उपस्थित होते. सचिव ॲड. अविनाश थोरवे यांनी बुट्टे यांच्या कार्याची माहिती सांगितली. जयश्री गोपाळे व प्रफुल्ल बोऱ्हाडे यांनी सूत्रसंचालन केले. प्रभारी मुख्याध्यापक सदानंद उकिरडे यांनी आभार मानले.