जुन्नर, ता. १८ : ज्या विद्यार्थ्यांना यापूर्वी शासकीय औद्योगीक प्रशिक्षण संस्थेतील व्यवसाय अभ्यासक्रमांसाठी अर्ज सादर करता आले नाहीत, त्यांच्यासाठी शासनाने २० ऑगस्टपर्यंत मुदत वाढविली आहे. इच्छुकांनी वाढीव मुदतीचा लाभ घेऊन ऑनलाइन अर्ज सादर करावेत, असे आवाहन माणिकडोह (ता. जुन्नर) येथील आयटीआयचे प्राचार्य डी. एस. जगताप यांनी केले.
या अर्जांचा विचार समुपदेशन फेरीसाठी केला जाणार आहे. २२ ते २६ ऑगस्टपर्यंत केंद्रीय समुपदेशन फेरी व २७ ते ३१ ऑगस्टपर्यंत संस्था स्तरीय समुपदेशन फेरीचे आयोजन केले आहे. माणिकडोह येथील डॉ. गोविंद मोघाजी गारे शासकीय औद्योगिक प्रशिक्षण संस्थेत सुरू असलेल्या मोटार मेकॅनिक, डिझेल मेकॅनिक, वायरमन, टर्नर, फिटर, पेंटर, मशिनिस्ट, वेल्डर, टूल अँड डाय मेकर, मेकॅनिक मशिन टूल मेंटेनन्स, ड्रेस मेकिंग या व्यवसाय अभ्यासक्रमात उमेदवारांना शिल्लक जागांवर प्रवेशासाठी संधी उपलब्ध असल्याचे जगताप यांनी सांगितले.
रोजगाराची संधी, तंत्रज्ञानाचा विकास, वाढत्या उद्योग संस्था, तसेच शिक्षणासाठी लागणारा कमी खर्च व शिक्षण पूर्ण होण्यापूर्वीच कॅम्पस मुलाखती, यामुळे शासकीय औद्योगीक प्रशिक्षण संस्थेत शिक्षण घेण्याकडे कल वाढत असल्याचे प्रा. जगताप यांनी सांगितले.