जुन्नर, ता. २८ : अष्टविनायक श्री क्षेत्र लेण्याद्री (ता. जुन्नर) येथे ऋषिपंचमीनिमित्त गुरुवारी (ता. २८) लेण्याद्री गणपती देवस्थान ट्रस्टच्या वतीने ‘अथर्वशीर्ष पठण’ आयोजित केले होते. यावेळी महिलांनी मोठ्या संख्येने सहभाग घेतला.
श्री लेण्याद्री गणपती देवस्थान ट्रस्टचे सेक्रेटरी शंकर ताम्हाणे, खजिनदार भगवान हांडे, विश्‍वस्त सदाशिव ताम्हाणे, काशिनाथ लोखंडे यांच्या हस्ते सकाळी श्रींच्या मूर्तीची पूजा झाली. त्यानंतर भाविकांनी ‘अथर्वशीर्ष पठण’ केले. महाआरतीने कार्यक्रमाची सांगता झाली. देवस्थानच्या वतीने महिला भाविकांना फलाहार देण्यात आला. यानिमित्त मंदिरात फुलांची सजावट केली होती. गोळेगाव येथील श्री स्वामी समर्थ आध्यात्मिक बालविकास केंद्र महिला सेवेकरी, महिला बचत गट यांचे सहकार्य लाभले. यावेळी देवस्थानचे अध्यक्ष ॲड. संजय ढेकणे, सेक्रेटरी शंकर ताम्हाणे, खजिनदार भगवान हांडे, विश्‍वस्त सदाशिव ताम्हाणे, काशिनाथ लोखंडे, कार्यालयीन सचिव रोहिदास बिडवई, व्यवस्थापक नीलेश सरजिने उपस्थित होते.