जुन्नर, ता. १८ : येथे शिक्षकांच्या विविध प्रश्नांबाबत पुणे जिल्हा प्राथमिक शिक्षक समितीची सहविचार सभा आयोजित करण्यात आली होती. यामध्ये शिक्षकांची ऑनलाइन कामे बंद करावीत, असा ठराव एकमताने मंजूर केल्याची माहिती कार्याध्यक्ष बाळासाहेब लांघी यांनी दिली.
सभेच्या अध्यक्षस्थानी संघटनेचे राज्य कोषाध्यक्ष नंदकुमार होळकर होते. होळकर म्हणाले, ‘‘सध्या ऑनलाइन कामाने त्रस्त झाल्याने त्यांना विद्यार्थ्यांपर्यंत पोहोचणे कठीण झाले आहे. शिक्षक ऑनलाइन काम करण्यात व्यस्त झाल्याने गुणवत्तेवर परिणाम होत आहे.’’
यावेळी सभेत जुन्नर व आंबेगाव तालुक्यात एकस्तर वेतनश्रेणी, वरिष्ठ वेतन श्रेणी, निवड श्रेणी या प्रश्नाबाबत विचार विनिमय करण्यात आला. तसेच संघटनेच्या वतीने जुन्नर व आंबेगाव तालुक्यात पेसा भागात काम करणाऱ्या ४१ शिक्षण सेवक, केंद्रप्रमुख, मुख्याध्यापक, पदोन्नती झालेल्या शिक्षकांचा सन्मान करण्यात आला. याप्रसंगी जिल्हाध्यक्ष सुनील वाघ, सरचिटणीस संदीप जगताप, विठ्ठल जोशी, नामदेव मुंढे, विलास कुदळ, राजेंद्र गारे, कैलास मुठे, बाळासाहेब गोडे, स्वाती भोर, राजेश दुर्गुडे, गौरी लांघी आदी उपस्थित होते.