जुन्नर, ता.११ : जुन्नर न्यायालयाने विनयभंगाच्या गुन्ह्यातील आरोपीस (ता.१०) दोषी ठरवून कारावास व दंडाची शिक्षा ठोठावली आहे. स्वप्नील सुरेश सरजिने (रा.सरजिनेवाडी-अलदरे ता.जुन्नर) असे शिक्षा झालेल्या आरोपीचे नाव आहे.
जुन्नरच्या दिवाणी व फौजदारी न्यायालयाच्या न्यायाधीश एस. एस. जैन यांनी आरोपीस विनयभंगाच्या आरोपाखाली एक वर्ष कारावास व दहा हजार रुपये दंड तसेच दंड न भरल्यास दोन महिने साधा कारावास अशी शिक्षा ठोठावली आहे. याबाबत जुन्नर पोलिसांनी पीडित महिलेने दिलेल्या फिर्यादी नुसार तिचा नातेवाइक असलेल्या आरोपीविरुद्ध पोलिस ठाण्यात २०२१ मध्ये विविध कलमान्वये गुन्हा दाखल केला होता. न्यायालयाने आरोपीस भारतीय दंड विधान कलम ३२३ मध्ये देखील दोषी ठरवून दहा महिने कारावास व एक हजार रुपये दंड तसेच दंड न भरल्यास पंधरा दिवस साधा कारावास शिक्षा सुनावली आहे.
सरजीने पीडित महिलेचा मावस दीर असून, तो नेहमी घरी जेवणासाठी येत होता. आरोपीने १४ मे २०२१ रोजी पीडित महिलेच्या बेडरूममध्ये येऊन विनयभंग केला होता. यावेळी महिलेने आरडाओरडा केल्याने आरोपीने तीस घराबाहेर ओट्यावर ओढत आणून हाताने मारहाण व शिवीगाळ करून जीवे मारण्याची धमकी दिली होती, अशी माहिती प्रभारी अधिकारी पोलिस किरण अवचर यांनी दिली. जिल्हा कोर्ट पैरवी अधिकारी पोलिस निरीक्षक संतोष घोळवे व सरकारी वकील सीमा अवचर यांनी काम पाहिले.