खळद, ता. ३ : खळद (ता. पुरंदर) येथे रखमाजीची वस्ती येथे पुरातन काळुबाई मंदिरात काळुबाई यात्रा पारंपरिक पद्धतीने मोठ्या उत्साहात साजरी करण्यात आली. यात्रेनिमित्त पहाटे देवीची अभिषेक, महापूजा करण्यात आली. या वेळी पहाटेपासूनच भाविकांनी मंदिरात दर्शनासाठी मोठी गर्दी केली होती.
सायंकाळी चार वाजता ढोल-ताशांच्या गजरात देवीची भव्य मिरवणूक काढण्यात आली. या मिरवणुकीत महिलांनी मोठ्या संख्येने सहभाग घेतला होता. या वेळी मिरवणूक मार्गावर सर्वत्र आकर्षक रांगोळ्या काढण्यात आल्या होत्या. अनेक घरांमध्ये असलेल्या काळूबाईच्या देवीच्या मूर्तीही या मिरवणूक मार्गावर मुख्य देवीच्या मिरवणुकीत भेट देत यात्रेत सहभागी झाल्या, तर घरोघरी भाविकांनी पाद्यपूजन करून औ‌क्षण केले हे या यात्रेचे विशेष आकर्षण ठरले. मिरवणूक सायंकाळी सुमारे सहा वाजता मंदिर परिसरात पोहोचली. त्यानंतर देवीच्या मानपानाचा विधी पार पडला. यात्रेच्या निमित्ताने मानकरी व उपस्थित भाविकांचा सन्मान केला. त्यानंतर भाविकांसाठी अन्नदानाचा कार्यक्रम आयोजित केला. पारंपरिक श्रद्धा, भक्तिभाव आणि सामाजिक सलोखा जपत साजऱ्या झालेल्या या काळुबाई यात्रेने परिसरात भक्तिमय वातावरण निर्माण झाले. भाविकांनी मोठ्या संख्येने उपस्थित राहून देवीचे दर्शन घेत यात्रेची सांगता भक्तिभावात झाली.