कडूस, ता. १० : कडूस-टोकेवाडी (ता.खेड) येथील युवा शेतकरी अरुण पोपट शिंदे यांनी दीड एकर क्षेत्रावर कलिंगडाचे पीक फुलविले. मेहनत आणि आधुनिक तंत्रज्ञानाच्या जोरावर त्याने एकरी सुमारे २५ टन उत्पादन मिळविले.
नवीन तंत्रज्ञानाचा वापर करीत नावीन्यपूर्ण पीक घेऊन एक आदर्श निर्माण केला आहे. आधुनिक सिंचन तंत्र, मल्चिंग पेपर आणि खते व्यवस्थापनाच्या उपयोगाने त्यांना आपले उत्पादन यशस्वीपणे वाढवले. मेहनत, पिकाची योग्य निवड, कामाचे नियोजन आणि तंत्रज्ञानाचा वापर यामुळे शेतकऱ्यांना उत्तम नफा मिळवता येऊ शकतो, हे मात्र त्यांनी दाखवून दिले. नावीन्यपूर्ण पीक प्रयोगातून त्यांनी मिळवलेला नफा इतर शेतकऱ्यांसाठी प्रेरणादायक ठरला आहे.

विकेत ते पिकेले या न्यायाने अरुण याने पारंपरिक पिकांना छेद देत कलिंगडाची निवड केली.

अशी केली लागवड
१. ट्रॅक्टरने शेतीची मशागत केली.
२. शेणखत टाकून साडे चार फुटाच्या अंतराचे बेड तयार केले.
३. बेडवर ठिबक सिंचनचे पाइप टाकले. त्यावर सिल्वर मल्चिंग पेपर अंथरला.
४. सिम्बा जातीची लागवडी योग्य तयार रोपांची लागवड
५. जमिनीचे तापमान आणि आर्द्रता नियंत्रणात ठेवली
६.मल्चिंग पेपरमुळे तणावर नियंत्रण राखले.
७. खते आणि किडीवरही नियंत्रण राखण्यात मदत झाली.

कलिंगडाचे वजन पाच किलो
अरुण शिंदे यांनी चांगल्या उत्पादनासाठी जैविक खतांचा वापर केला. लागवडीनंतर पाचव्याच दिवशी पाण्यातून खताचा पहिला डोस दिला. त्यानंतर दर पाच दिवसांनी पाण्यातून खतांची मात्रा दिली. कीटकनाशकाची वेळच्यावेळी फवारणी केली. यामुळे कलिंगडाच्या वेलीला सरासरी तीन ते पाच किलो वजनापर्यंत कलिंगडे लगडली.

मशागत, खते, औषधे, ठिबक सिंचन, मल्चिंग पेपरचा प्रतिएकरी सुमारे ८० हजार रुपये खर्च झाला. परंतु ६५ दिवसांच्या कठोर मेहनतीनंतर उत्पन्नातून चांगले फळ मिळाले. कलिंगडाला प्रतिकिलो नऊ रुपयांपासून तेरा रुपयांपर्यंत बाजारभाव मिळाला. तसा अपेक्षेपेक्षा बाजारभाव कमीच मिळाला. पारंपरिक पिकांपेक्षा कलिंगडाच्या पिकाने बऱ्यापैकी आर्थिक नफा मिळवून दिला.
- अरुण शिंदे, युवा शेतकरी

३८ ते ४० टन उत्पादन अपेक्षित
मेहनतीचा परिणाम म्हणून त्यांनी ६० दिवसांच्या कालावधीत कलिंगडाचे प्रतिएकरी जवळपास २५ टन उत्पादन घेतले आहे. सध्या फक्त एक एकर क्षेत्रावरील कलिंगडाची तोड सुरू आहे. अजून अर्धा एकर क्षेत्रावरील तोडीला काही दिवसांचा अवकाश आहे. दीड एकरातून त्यांना ३८ ते ४० टन उत्पादन अपेक्षित आहे.

01677