कडूस : खेड तालुक्याच्या पश्चिम पट्ट्यातील गावांमध्ये भाद्रपदी बैलपोळा सण मोठ्या उत्साहात साजरा करण्यात आला. सततच्या पावसामुळे शेत शिवारात निर्माण झालेल्या आव्हानांवर मात करत शेतकऱ्यांनी आपल्या लाडक्या बैलांप्रती कृतज्ञता व्यक्त केली. यावेळी भंडाऱ्याची उधळण करत ग्रामस्थांनी आनंद व्यक्त केला.
तालुक्याच्या पश्चिम पट्ट्यातील कडूस, गारगोटवाडी, दोंदे, वडगाव पाटोळे, कोहिंडे या गावांमध्ये भाद्रपदी बैलपोळा उत्साहात साजरा करण्यात आला. यावर्षी पाऊस जास्त असूनही शेतकऱ्यांचा उत्साह जराही कमी झालेला दिसला नाही. काही शेतकऱ्यांनी बैलांना आकर्षक रंगीत कापडांनीही सजवले होते. गावातील प्रमुख रस्त्यांवरून बैलांची वाजतगाजत मिरवणूक काढण्यात आली. . मिरवणुकीत पारंपारिक वाद्ये आणि डीजेच्या तालावर ग्रामस्थ नाचत होते. मिरवणुकीमुळे गावागावांनी उत्साहाचे वातावरण निर्माण झाले होते. मिरवणुकीने ग्रामदैवताला उजवी प्रदक्षिणा घालून दाराशी आणलेल्या बैलांचे घरातील सुवासिनींच्या हस्ते पूजन करून त्यांना पुरणपोळीचा घास भरविण्यात आला. गारगोटवाडी येथे तर सजवलेल्या बैलांवर मिरवणुकीत शोभेच्या तोफेने भंडाऱ्याची उधळण करण्यात आली.

01959