कडूस, ता. ८ : कडूस ते राजगुरुनगर (ता. खेड) या दहा किलोमीटर अंतराच्या रस्त्याचे रुंदीकरण व काँक्रिटीकरणाचे काम वेगाने सुरू आहे. रस्त्याच्या रुंदीकरणासाठी अडथळा ठरणारी वृक्षांची तोड सुरू आहे. यात लहान मोठी सुमारे १५० झाडांची कत्तल करण्यात आली आहे. यात दोंदे व वडगाव पाटोळे गावच्या शिवेवरील सुमारे १५० वर्षांपेक्षा जास्त जुने डेरेदार चिंचेचे झाड बुंध्यापासून तोडले आहे.
या जुन्या चिंचेचा वृक्षाबाबत परिसरातील नागरिकांच्या मनात असंख्य आठवणी दडलेल्या आहेत. डॉ. राजेश बनकर म्हणाले की, दोंदे गावावरून तालुक्याच्या गावी म्हणजेच राजगुरुनगरकडे जाणाऱ्या रस्त्यावर गावच्या शिवेवर उजव्या बाजूस उभे असलेले ते चिंचेचे झाड, आमच्या बोलीभाषेत ‘शिवची चिंच’ म्हणून ओळखलं जात होते. रस्ता काँक्रिटीकरण आणि रुंदीकरणाच्या कामात कापले गेले, त्याचे तुटून पडलेलं भले मोठे खोड, बुंधा हे पाहताना मनात एक हळवी पोकळी दाटून आली. विकासासाठी अशा कितीतरी पारंपरिक आठवणींच्या खुणा नामशेष होताना आपण पाहतो. मनाला अतीव दुःख होते, पण विकासाच्या नावाखाली नाइलाजाने दुःख पचवावं लागतंय, असे त्यांनी नमूद केले.

2098