पळसदेव, ता. ३१ : पळसदेव (ता. इंदापूर) ग्रामपंचायतीच्या सरपंचपदी सुमारे ११ महिन्यांपूर्वी विराजमान झालेल्या सरपंच अंकुश भीमराव जाधव यांनी आपल्या पदाचा राजीनामा दिला आहे. त्यामुळे आता उरलेल्या ९ महिन्यांसाठी सरपंचपदाची माळ कोणाच्या गळ्यात पडणार, याची ग्रामस्थांना उत्सुकता लागली आहे.
जानेवारी २०२१ मध्ये ग्रामपंचायतीची पंचवार्षिक निवडणूक झाल्यानंतर इंद्रायणी सुजित मोरे यांना सरपंच पदावर विराजमान होण्याची संधी मिळाली होती. त्यांनी दोन वर्षांहून अधिक काळ गावगाडा हाकला. त्यांच्या राजीनाम्यानंतर सरपंचपदाच्या निवडीत झालेल्या राजकीय गटबाजीत आजिनाथ पवार यांना सरपंचपदाची खुर्ची मिळाली. त्यांनी वर्षभराहून अधिक काळ सरपंचपदाची धुरा सांभाळल्यानंतर राजीनामा दिला. यानंतर अंकुश जाधव यांना सरपंचपदी विराजमान करण्यात आले. जाधव यांनी राजीनामा दिल्यामुळे आता सरपंचपदाची खुर्ची रिकामी झाली आहे. या खुर्चीवर बसण्याचा बहुमान कोणाला मिळणार, हे पाहणे औत्सुक्याचे ठरणार आहे. उरलेल्या ९ महिन्यांच्या कालावधीसाठी सरपंचपद आपल्या पदरात पाडून घेण्यासाठी रस्सीखेच होणार असल्याची शक्यता आहे. कारण, पुढील पंचवार्षिक निवडणुकीत सरपंचपदाची निवड जनतेतून होणार आहे.

अभी नही तो कभी नही
अंकुश जाधव यांच्या राजीनाम्यानंतर होणाऱ्या सरपंचपदाच्या निवडणुकीत मोठ्या अंतर्गत घडामोडी होण्याची दाट शक्यता व्यक्त केली जात आहे. यापुढे जनतेतून सरपंच निवडला जाणार असल्याने सदस्यांच्या मतांवर सरपंच होण्याची एवढीच संधी आहे. यामुळे ‘अभी नहीं तो कभी नहीं’र असे म्हणत काही इच्छुकांनी जोरदार प्रयत्न सुरू ठेवले आहेत.