कळस, ता. २२ : कळस (ता. इंदापूर) येथे मध्यरात्री चोरट्यांनी दोन दुकाने फोडून रोख रकमेसह सुमारे दीड लाख रुपयांचा मुद्देमाल लंपास केला. छताचा पत्रा कापून आणि शटर उचकटून चोरट्यांनी हे धाडसी कृत्य केले.
विशाल खारतोडे यांच्या ''श्रीराम हार्डवेअर''चे छताचा पत्रा उचकटून चोरट्यांनी आत प्रवेश केला. दुकानातील ३० हजारांचे कॉपर वायर बंडल, २० हजारांचे स्टार्टर, ७ हजारांचा विद्युत पंप आणि ७ हजारांची रोकड असा मुद्देमाल चोरला. त्यानंतर लगतच्या ''श्रीराम गिफ्ट शॉपी''चे शटर उचकटून ३० हजारांची रोकड आणि ५० हजार रुपये किमतीचे सोन्याचा मुलामा असलेले दागिने लंपास केले. पुरावा नष्ट करण्यासाठी चोरट्यांनी दोन्ही दुकानांतील सीसीटीव्हीचा डीव्हीआर आणि बाहेरील कॅमेऱ्यांच्या केबलही कापून नेल्या आहेत. या घटनेमुळे व्यापाऱ्यांमध्ये भीतीचे वातावरण असून पोलिसांनी रात्रीची गस्त वाढवण्याची मागणी होत आहे. तीन वर्षांपूर्वीही याच दुकांनामध्ये चोरी झाली होती, मात्र अद्याप त्याचा छडा लागलेला नाही.
ग्रामसुरक्षा यंत्रणा बंद
आपत्कालीन काळात ग्रामस्थांना सतर्क करणारी ''ग्रामसुरक्षा यंत्रणा'' गेल्या काही वर्षांपासून कळसमध्ये बंद आहे. खर्चाअभावी ग्रामपंचायतीने ही यंत्रणा बंद ठेवल्याने चोरीच्या घटनांवेळी ग्रामस्थांना सूचना मिळणे कठीण झाले आहे. ही यंत्रणा तातडीने सुरू करण्याची मागणी ग्रामस्थांनी केली आहे.