कानगाव, ता. ४ : पाटस (ता. दौंड) येथील ग्रामपंचायतीची तहकूब ग्रामसभा गुरुवारी (ता. ४) ग्रामपंचायत कार्यालयात झाली. त्यामध्ये विषय पत्रिकेवरील विषयांवर चर्चा होऊन काही शाब्दिक बाचाबाची झाली.
पाटस ग्रामपंचायतीची मासिकसभा २९ आॅगस्ट रोजी ग्रामपंचायत कार्यालयात होती. या मासिक सभेमध्ये ग्रामपंचायत सदस्य राजेश सोनवणे व सरपंच तृप्ती भंडलकर यांच्यात सरपंचपदाच्या राजीनाम्यावरून शाब्दिक वादावादी झाली. त्यामध्ये सोनवणे यांनी अपशब्द वापरत आरडाओरड केली. हा मुद्दा सरपंच भंडलकर यांनी ग्रामसभेमध्ये उपस्थित केला. त्यावर सोनवणे यांनी स्पष्टीकरण देताना पुन्हा संबंधित अपशब्दाचा पुनउच्चार केला. त्यावर ग्रामसभेमध्ये सोनवणे यांच्या वक्तव्याच्या निषेधाचा ठराव मंजूर केला.
दरम्यान, या ग्रामसभेमध्ये आलेल्या अर्जांचे वाचन करत असताना ग्रामपंचायतीच्या दोन सदस्यांनी दिलेल्या राजीनामा अर्जाचे वाचन ग्रामसभेमध्ये करण्यात आले. यावर ग्रामसभेने असे सुचविले की, सदरचे सदस्यांचे राजीनामे मंजूर करण्याचे अधिकार सरपंच यांना असल्याने ही ग्रामसभा राजीनामा मंजूर करण्याबाबतची शिफारस करत असून, सरपंच यांनी राजीनामे मंजूर करावेत.संबंधित सदस्यांशी भ्रमणध्वनीद्वारे संपर्क केला असता. त्यांनी राजीनामे दिले आहेत, असे सांगितले.

पाटस ग्रामपंचायतीच्या दोन सदस्यांनी सदस्यपदाचे राजीनामे सरपंचांकडे सुपूर्त केले होते. ते सरपंचांनी ग्रामसभेपुढे माहितीसाठी ठेवले होते. त्यावर ग्रामसभेमध्ये चर्चा होऊन सदरचे राजीनामे मंजूर करण्याचा अधिकार सरपंचांना असल्याने सरपंच यांनी कायदेशीर बाबी तपासून पुढील कारवाईसाठी संबंधितांकडे पाठवावे, असे जयशिवसंग्राम पक्षाचे प्रदेश उपाध्यक्ष वसंत साळुंखे यांनी सांगितले.