कानगाव, ता. २६ : कुसेगाव (ता. दौंड) येथे मंगळवारी (ता. २५) श्री भानोबा देवाचे उत्साहात आगमन झाले. वर्षभर कोयाळी या गावात असणाऱ्या भानोबा देवाचे मामाच्या गावी अर्थात आजोळी आगमन झाल्याने गावात उत्साहाचे वातावरण झाले आहे.
कोयाळी गावची यात्रा संपल्यानंतर कोयाळी ते कुसेगाव अशी तीन दिवसांची पायी वारी करत गावातील भाविक भक्तांसहित देवाचे गावात आगमन झाले. भक्तांनी पारंपरिक नृत्य करत आनंदोत्सव साजरा केला. फटाक्यांच्या आतषबाजीत भानोबा देवाचे स्वागत झाले. भानोबा देव गावात १५ दिवस राहणार असल्याने आसपासच्या परिसरातील भाविक दर्शनासाठी येतात. त्यामुळे गाव गजबजून गेला आहे.
कुसेगाव (ता. दौंड) येथील ग्रामदैवत भानोबा देवाची यात्रा शुक्रवार (ता. ५) आणि शनिवारी (ता. ६) आहे. या पार्श्‍वभूमीवर गावात जय्यत तयारी सुरू आहे. यात्रेचा राज्यभरात नावलौकिक आहे. देव-दानव युद्ध यात्रेचे मुख्य आकर्षण आहे. राज्यभरातून भाविक येथे दर्शनासाठी येतात. त्यामुळे गावाला एक आगळी वेगळी शोभा येते. यात्रेनिमित्त गावात, भानोबा देवाच्या मंदिराला आणि गावातील सर्व मंदिरांना विद्युत रोषणाई, साफसफाई केली आहे. यात्रेसाठी गाव सज्ज झाले आहे.