केसनंद, ता. १३ : न्हावी सांडस येथे सुमारे ७० टक्के तर मोठी गावे असलेल्या पेरणे व लोणीकंद येथे ५८ टक्के व केसनंद येथे ४५ टक्क्यांपेक्षा अधिक मतदान झाले. मतदानाच्या तुलनेत दिवसभरात फार मोठ्या रांगा अथवा गर्दी दिसून आली नाही.

सध्या वाढत्या उन्हाचा चटका, दुपारनंतर पावसाची शक्यता तसेच शेतातील कामांच्या व्यापामुळे पूर्व हवेलीच्या ग्रामीण भागात सकाळपासूनच मतदार मतदानाला बाहेर पडले. त्यामुळे दुपारपर्यंत काही गावात २५ ते ३० टक्क्यांपर्यंत मतदान झाले. तर दिवसभर कार्यकर्ते मतदारांना मतदानासाठी आणण्यासाठी परिश्रम घेताना दिसत होते.

लोणीकंद येथे ६४४७ पैकी ५८ टक्के म्हणजे ३७५६ मतदारांनी मतदान केले. बुर्केगावात १६४३ पैकी ६८ टक्के म्हणजे ११०२ मतदान झाले. शिरसवडीत ६५ टक्के, तसेच पिंपरी सांडसमध्ये २८७० पैकी १७७५ म्हणजे सुमारे ५५ टक्के मतदारांनी मतदानाचा हक्क बजावला. तर १० हजार ७७४ मतदार असलेल्या केसनंद येथे साधारण ४५.७२ टक्के म्हणजे ४९२६ मतदार मतदानासाठी आले.