केसनंद, ता. ९ : कोलवडी (ता. हवेली) येथे मुळा- मुठा नदी पात्रात अवैध वाळू उपसा करणाऱ्या रेकॉर्डवरील एकावर गुन्हे शाखेच्या युनिट ६च्या पथकाने कारवाई करीत पोकलेन मशिन व दोन ट्रॉलीसह ट्रॅक्टर, तसेच ८ ब्रास वाळू, असा एकूण ३५ लाख ४० हजार रुपयांचे साहित्य जप्त केले.
गुन्हे शाखेच्या युनिट सहाच्या पथकाने कारवाई केलेल्या पंकज सदाशिव गायकवाड (वय ३८, रा. कोलवडी) याच्या विरुद्ध पुणे शहर व जिल्ह्यातील विविध पोलिस ठाण्यात गंभीर गुन्हे दाखल आहेत. याबाबत पोलिसांनी दिलेल्या माहितीनुसार, गुन्हे शाखेच्या युनिट सहाचे पोलिस पथक थेऊर ते कोलवडी गावातील मुळा -मुठा नदी पात्रामध्ये अवैधरीत्या वाळू उपसा करणाऱ्यांचा शोध घेत असताना कोलवडी येथील शितोळे वस्ती येथे ट्रॅक्टर व पोकलेन मशिन वाळू उपसा करत असल्याचे दिसून आले.
पोलिसांनी पंकज गायकवाड व साथीदारांना ताब्यात घेऊन नदी पात्रातील अवैधरीत्या वाळू उपसा करण्यासाठी वापरलेले ट्रॅक्टर व यंत्रसामग्रीही जप्त करून पुढील कारवाईसाठी लोणीकंद पोलिसांच्या ताब्यात दिली. याप्रकरणी लोणीकंद पोलिस ठाण्यात गुन्हा दाखल केला आहे.