कोरेगाव भीमा, ता. १९ : येथील भीमा नदीपात्रात पेरणे (ता. हवेली) हद्दीत शनिवारी (ता. १९) सकाळी एका अनोळखी पुरुषाचा मृतदेह आढळून आला. मृतदेह पाहण्यासाठी पुलावर बघ्यांची मोठी गर्दी झाल्याने पुणे- अहिल्यानगर मार्गावर बराच वेळ वाहतूक कोंडी झाली होती.
याबाबत लोणीकंद पोलिसांनी दिलेल्या माहितीनुसार, पेरणे हद्दीत भीमा नदीच्या पात्रात शनिवारी अंदाजे ४० ते ४५ वर्षे वयोगटाचा रंग गोरा, मध्यम बांधा, अंगावर काळ्या रेषांचा शर्ट, बनियन अशा वर्णनाच्या एका अनोळखी पुरुषाचा मृतदेह तरंगताना दिसल्याबाबत नागरिकांनी पोलिसांना माहिती दिली. यानंतर लोणीकंद पोलिस ठाण्याचे पोलिस निरीक्षक सर्जेराव कुंभार यांनी तत्काळ पोलिस पथक घटनास्थळी पाठवले. पोलिसांनी तातडीने मृतदेह नदीतून बाहेर काढून पंचनामा व प्राथमिक तपासणीची कार्यवाही करून पुढील तपासणीसाठी ससून रुग्णालयात पाठवला. नदीपात्रात आढळलेल्या या अनोळखी मृतदेहाची ओळख पटविण्याचे काम सध्या सुरू असून, पोलिस निरीक्षक सर्जेराव कुंभार यांच्या मार्गदर्शनाखाली लोणीकंद पोलिस अधिक तपास करीत आहेत.