कोरेगाव भीमा, ता. २५ : पुणे-अहिल्यानगर महामार्गावरील औद्योगिक पट्ट्यातील उद्योगांची एक प्रमुख संस्था असलेल्या ‘डेक्कन चेंबर ऑफ कॉमर्स, इंडस्ट्रीज अँड ॲग्रिकल्चर’ (डीसीसीआयए) च्या अध्यक्षपदी उद्योजक एच.पी. श्रीवास्तव यांची, तर उपाध्यक्षपदी उद्योजक डॉ. प्रकाश धोका यांची बिनविरोध निवड झाली. चेंबरच्या नुकत्याच झालेल्या बैठकीत ही निवड जाहीर करण्यात आली.
उद्योजक व्ही. एल. मालू यांनी मानद सचिवपदी आणि विभू प्रसाद यांची कोषाध्यक्षपदी निवड झाली आहे. गेल्या तीन दशकांहून अधिक काळ उद्योग, वाणिज्य व व्यापारासह पुणे व परिसराच्या विकासात योगदान देणारी ‘डीसीसीआयए’चा पूर्व पुण्यातील एक महत्त्वाची संस्था म्हणून नावलौकिक आहे. उद्योजक, उद्योग-व्यवसाय, सरकार तसेच संबंधित भागधारकांमध्ये एक महत्त्वाचा दुवा म्हणून ही संस्था काम करते. चेंबरकडून उद्योगांसाठी नेटवर्किंग, तंत्रज्ञान आणि व्यवसाय संधीसाठी विविध उपक्रम राबविले जातात.
गेल्या तीन दशकांहून अधिक काळ देश व परदेशात कॉर्पोरेट क्षेत्रात वरिष्ठ पदांचा अनुभव असलेले व ‘डीसीसीआयए’च्या माध्यमातून दोन दशकांहून अधिक काळ उद्योगक्षेत्राचे नेतृत्व करणारे नवनिर्वाचित अध्यक्ष श्रीवास्तव यांना उपाध्यक्ष म्हणूनही दीर्घकाळ कामाचा अनुभव आहे. नवनिर्वाचित उपाध्यक्ष डॉ. धोका यांनी यापूर्वी ‘डीसीसीआयए’चे अध्यक्षपदही भूषविले असून सामाजिक क्षेत्रांतील विविध उपक्रमात त्यांचे योगदान आहे.