केडगाव, पाटस, ता. ९ ः दौंड तालुक्यात सोमवारी (ता. ८) विविध ठिकाणी मुसळधार पाऊस झाला. वरवंड व पाटस येथे अतिवृष्टी झाल्याची माहिती तहसीलदांनी दिली आहे. पावसामुळे शेतकऱ्यांतून समाधान व्यक्त होत आहे. तालुक्यात मंगळवारी मध्यम स्वरूपाचा पाऊस झाला.

२४ तासांत ६५ मिलिमीटर पावसाची नोंद झाली तर अतिवृष्टी समजली जाते. सोमवारी वरवंड येथे ७२ तर पाटस येथे ७८ मिलिमीटर (आतापर्यंत एकूण ३९६) पाऊस काही तासांत झाला आहे. यवत येथे ५० (आतापर्यंत एकूण १९३) तर दौंड येथे ४३ मिलिमीटर पाऊस झाला. सर्वात कमी पाऊस रावणगाव येथे तीन मिलिमीटर झाला. केडगाव येथे ३५ मिलिमीटर (आतापर्यंत एकूण २७३), देऊळगाव राजे व राहू येथे प्रत्येकी १० मिलिमीटर पाऊस झाला.
तालुका कृषी अधिकारी राहुल माने व आत्माचे समन्वयक महेश रूपनवर म्हणाले, ‘‘सोमवारी झालेला पाऊस हा ऊस व बाजरी पिकांना गरजेचा होता. या पावसामुळे पिकांना जीवदान मिळाले आहे. दौंड तालुक्यात गेल्यावर्षी जून, जुलै महिन्यांत १०४ मिलिमीटर पाऊस झाला होता. यंदा ९ जुलैपर्यंत ३०१ मिलिमीटर पाऊस झाला आहे. दौंड तालुक्यात पूर्ण पावसाळ्यात सरासरी ४५० मिलिमीटर पाऊस पडतो. आतापर्यंत सरासरी ३०१ मिलिमीटर पाऊस झाला असून तालुक्यात सोमवारी सरासरी ३७.६ मिलिमीटर पाऊस झाल्याची माहिती तहसील कार्यालयातील शरद सोनवणे यांनी दिली.

‘पंचनाम्यांचे अहवाल सादर करा’
अतिवृष्टीमुळे नुकसान झालेल्या पिकांचे पंचनामे करून अहवाल सादर करण्याचे आदेश तलाठ्यांना दिले आहेत. असे अहवाल प्राप्त झाल्यानंतर ते तातडीने जिल्हाधिकारी कार्यालयाकडे पाठविण्यात येतील, अशी माहिती तहसीलदार अरुण शेलार यांनी दिली.

दौंड तालुक्यात मिलीमीटर
सोमवारी (ता. ८) झालेला पाऊस पुढीलप्रमाणे (मिलीमीटर मध्ये) : पाटस - ७८, वरवंड - ७२, यवत - ५०, दौंड - ४३ , केडगाव - ३५, रावणगाव - २८, देऊळगाव राजे - १०, राहू - १०.