केडगाव, ता. ४ : पुणे-सोलापूर महामार्गावरील चौफुला (ता. दौंड) येथील सेवा रस्त्यावरील खड्डे सिमेंट क्राँक्रिटने बुजविल्याने महामार्ग टोल प्रशासनाने सेवा रस्ता चार दिवसांसाठी बंद ठेवला आहे. वाहन चालकांनी पर्यायी रस्त्याचा वापर करावा असे आवाहन केले आहे.
चौफुला चौकात आधीच मोठ्या प्रमाणात वाहतूक कोंडी होत असते. आता एक सेवा रस्ता वाहतुकीसाठी बंद राहणार असल्याने कोंडीत आणखी भर पडली आहे. चौफुला चौकातील भारत पेट्रोलपंप-बजाज शोरूम-हंडाळ हॅास्पिटल-जयराम ऑटोमोबाईल या दरम्यानचा सेवा रस्ता वाहतुकीसाठी रविवारी (ता. ८) सकाळी वाहतुकीसाठी खुला होणार आहे.
हंडाळ हॅास्पिटल समोरच्या रस्त्याला सतत पाण्यामुळे मोठे खड्डे पडत आहेत. हे खड्डे आज बुजविण्यात आले. टोल प्रशासन सतत रस्त्याला मलमपट्टी करत आहे. हा भाग सखल असून तेथे पाण्याची सतत दलदल आहे. त्यामुळे या भागात डांबरीकरणाचे रस्ते टिकत नाही. या ठिकाणी १०० मीटर लांबीचा रस्ता सिमेंट क्राँक्रिटचा करावा अशी मागणी होत आहे. याकामासाठी वरिष्ठ कार्यालयाकडे प्रस्ताव पाठविला जाईल. कामाची मंजुरी मिळाल्यानंतर व पाऊस कमी झाल्यानंतर हे काम केले जाईल. असे टोल प्रशासनाकडून सांगितले.

चौफुला चौकात पोलिस हवेत
चौफुला चौकात व्यावसायिकांनी रस्त्याची जागा अडविल्याने चौकात वाहतुकीची कोंडी सततची झाली आहे. यावर टोल प्रशासन व पोलिस काहीही कारवाई करत नाही. त्यामुळे धंदेवाल्यांची संख्या दिवसेंदिवस वाढत आहे. वाहतूक नियंत्रणासाठी चौकात पोलिस हवेत अशी मागणी ग्रामस्थांनी केली आहे. व्यावसायिकांकडून हप्ते घेतले जातात त्यामुळे कारवाई होत नाही. अशा नागरिकांच्या तक्रारी आहेत.