केडगाव, ता. २१ ः केडगाव ( ता.दौंड ) येथे शिवजन्मसोहळा समितीच्यावतीने छत्रपती शिवाजी महाराज यांची जयंती उत्साहात साजरी करण्यात आली. शिवजयंतीनिमित्त विविध कार्यक्रमांचे आयोजन आले होते. येथील शिवभक्तांनी पुरंदर किल्ल्यावरून शिवज्योत आणली. सकाळी शिवाजी महाराज यांच्या पुतळ्याचे ग्रामस्थांनी पूजन केले. यानंतर आमदार राहुल कुल, जिल्हा परिषदेचे सदस्य तुषार थोरात, अभिषेक थोरात, राहुल हंडाळ आदी मान्यवरांनी शिवाजी महाराज यांना अभिवादन केले.
दिवसभरात ग्रामस्थांनी छत्रपती शिवाजी महाराज यांच्या प्रतिमेचे दर्शन घेतले. सायंकाळी सात वाजता छत्रपती शिवाजी महाराज यांच्या पुतळ्याची केडगाव बाजारपेठेतून भव्य मिरवणूक काढण्यात आली. यावेळी ‘जय भवानी जय शिवाजी’, अशा घोषणांनी आसमंत दुमदुमून गेला होता. मिरवणुकीची केडगाव पोलिस ठाण्यासमोर सांगता झाल्यानंतर शिवाजी महाराजांची आरती घेण्यात आली. त्यानंतर विविध सांस्कृतिक कार्यक्रमांनी शिवजयंती सोहळ्यात रंगत आणली. सांस्कृतिक स्पर्धेत भाग घेतलेल्या विद्यार्थ्यांना यावेळी पारितोषिके देण्यात आली.

04219