निमगाव केतकी, ता. १८: शेतकऱ्यांच्या संपूर्ण कर्जमुक्तीसह अन्य मागण्यांसाठी रघुनाथ दादा पाटील प्रणित शेतकरी संघटनेच्या वतीने उद्या बुधवारी (ता. १९) पुण्यामध्ये विभागीय आयुक्तालय, कौन्सिल हॉल येथे एक दिवसाचे धरणे आंदोलन व आयुक्तालयास घेराव घालण्यात येणार आहे. यासाठी राज्याच्या विविध भागातून संघटनेचे पदाधिकारी व शेतकरी मोठ्या संख्येने उपस्थित राहणार असल्याची माहिती संघटनेचे पश्चिम महाराष्ट्र अध्यक्ष ॲड.पांडुरंग रायते यांनी दिली.
ॲड. रायते म्हणाले, छत्रपती शिवाजी महाराज जयंती ते साहेबराव करपे कुटुंबीयांचे स्मृतिदिन १९ फेब्रुवारी ते १९ मार्च या कालावधीमध्ये संपूर्ण कर्जमुक्ती जागृती अभियान राज्यांमध्ये संघटनेच्या वतीने राबविण्यात आले.

यावेळी सर्व शेतीमालावरील निर्यात बंदी उठवा. महाराष्ट्रातील सर्व शेतकरी, शेतमजूर, बारा बलुतेदार यांची कर्जातून मुक्तता करा, दुधासह सर्व शेतीमालास उत्पादन खर्चावर आधारित भाव मिळाला पाहिजे, शेती पंपासाठी दिवसा पूर्ण दाबाने वीज मिळाली पाहिजे, उसाला प्रतिटन पाच हजार रुपये भाव द्या नाहीतर दोन साखर कारखान्यामधील अंतराची अट रद्द करा, वन्यप्राणी संरक्षण कायदा रद्द करा. या प्रमुख मागण्यासाठी हे आंदोलन करण्यात येणार आहे.
यावेळी संघटनेचे अध्यक्ष रघुनाथ पाटील, कार्याध्यक्ष कालिदास आपेट, उपाध्यक्ष ॲड. अजित काळे, क्रांतिसिंह नाना पाटील ब्रिगेडचे अध्यक्ष शिवाजी नांदखिले हे मार्गदर्शन करणार आहेत.