निमगाव केतकी, ता. १५ : दुचाकीवरून पडून गंभीर जखमी झालेल्या शेळगाव (ता. इंदापूर) येथील अक्षय बापूराव मोहिते (वय २७) या युवकावर बारामती येथील गिरिराज हॉस्पिटल येथे उपचार सुरू आहेत. त्याच्या उपचाराचा खर्च चार लाखांपेक्षा अधिक आहे. अक्षय याची आर्थिक परिस्थिती खूपच हलाखीची असल्याने त्याच्या उपचारासाठी दानशूर व्यक्ती संस्थांनी पुढे येऊन आर्थिक मदत करावी, असे आव्हान ग्रामस्थ व नातेवाईक यांच्याकडून करण्यात येत आहे.
अक्षय हा बॅन्जो पार्टीमध्ये काम करतो. त्याला वडील नसून आजोबा, पत्नी, एक दीड वर्षाचा व एक सात महिन्यांचा लहान मुलगा आहे. कुटुंबात तोच कमवता आहे. सध्या त्याच्यावर मागील आठ दिवसांपासून आयसीयूमध्ये उपचार सुरू आहेत.
अक्षयचे चुलतभाऊ नानासाहेब लक्ष्मण मोहिते म्हणाले, अक्षय मागील आठ दिवसांपासून आयसीयूमध्ये उपचार घेत आहे. त्याचा रोजचा खर्च २५ हजारांपेक्षा जास्त होत आहे. आम्ही नातेवाइकांनी एक लाख रुपये जमा करून त्याच्या उपचारासाठी दिले आहेत. त्याची परिस्थिती खूपच गंभीर असल्याने त्याच्यावर किमान एक महिना उपचार करावे लागणार असल्याचे हॉस्पिटलमधून सांगण्यात येत आहे. त्यामुळे दानशूर व्यक्तींनी पुढे येऊन मदत करावी.
शेळगाव येथील डाळिंब छाटणीचे काम करणारे राजेंद्र भीमराव मोहिते म्हणाले की, अक्षयची परिस्थिती खूप नाजूक आहे. तो वाचला पाहिजे, त्यामुळे आम्ही कामाला जाणाऱ्या २० जणांनी एक दिवसाचा तेरा हजार रुपये पगार त्याच्या उपचारासाठी दिला आहे. इतरांनीही पुढे येऊन आर्थिक हातभार लावावा.
खालील क्रमांकावर (फोन पे) आर्थिक मदत करावी.
अक्षय मोहिते यांच्या पत्नी निर्जरा मोहिते-फोन पे नंबर-८१४९३८०३७८.