निमगाव केतकी, ता. २६: निमगाव केतकी (ता. इंदापूर) येथील शिक्षक उमेश लालासाहेब राऊत यांच्या बॅंक खात्यात जमा झालेले अज्ञात व्यक्तीच्या मोबाईलवरून ऑनलाइन पद्धतीने आलेले ९० हजार रुपये त्यांनी मुळ मालकाचा शोध घेत त्यांना परत करत प्रामाणिकपणाचे उत्तम उदाहरण समाजापुढे ठेवले. याबद्दल शिक्षक राऊत याचे संपूर्ण गावात कौतुक केले जात आहे.
गुरुवारी (ता. २४) राऊत यांच्या बॅंक खात्यात अचानक ९० हजार रुपये जमा झाले होते. हे पैसे नेमके कोणी पाठवले हे राऊत यांच्या लक्षात येत नव्हते. शेवटी ज्याने हे पैसे नजरचुकीने पाठवले होते. त्या नूर हसन शेख (डाळिंबाचे व्यापारी, उत्तरप्रदेश) या व्यक्तीचा राऊत यांना फोन आला. त्यांनी राऊत यांना सराफवाडी येथील शेतकऱ्याचे डाळिंबाचे पैसे त्यांना पाठवत असताना संपर्क क्रमांकातील एक आकडा चुकीचा दाबल्यामुळे ते पैसे तुमच्या खात्यात जमा झाल्याचे सांगितले.
व्यापारी शेख सध्या याच पासिरात डाळिंब खरेदीसाठी आलेले असल्याने ते व शेतकरी जाधव यांनी राऊत यांची भेट घेतली. या वेळी राऊत यांनी सदर खात्याची पडताळणी करून शेख यांचे बॅंक खात्याचे तपशील घेऊन प्रामाणिकपणे त्यांच्या खात्यात सर्व पैसे जमा केले.