खेड शिवापूर, ता. ७ : गायक व संगीतकार अजय गोगावले यांनी त्यांचे मूळ गाव असलेल्या ससेवाडी (ता. भोर) गावाला सहकुटुंब भेट दिली. यावेळी त्यांनी ग्रामदैवत झोराळी मातेचे दर्शन घेऊन ग्रामस्थांशी संवाद साधला. तसेच, ससेवाडी ग्रामपंचायतीला भेट देऊन ग्रामपंचायतीकडून राबविण्यात येत असलेल्या विविध उपक्रमांची माहिती घेतली. मुख्यमंत्री समृद्ध पंचायत राज अभियानांतर्गत लोकवर्गणी म्हणून ग्रामपंचायतीला २१ हजार रुपयांचा धनादेश दिला. यापुढेही गावच्या विविध आवश्यक विकासकामांसाठी मदत करण्याबाबत त्यांनी सकारात्मकता दर्शवल्याचे ग्रामस्थांनी सांगितले. यावेळी ससेवाडी ग्रामपंचायतीच्या सरपंच पूनम गोगावले, देविदास गोगावले, सागर वाडकर, महेंद्र वाडकर, लक्ष्मण गोगावले आदी उपस्थित होते.