कोळवण, ता. २१ ः मुळशी तालुक्यातील भरे येथील महावितरणचे उपअभियंता यांच्या कार्यालयात सतत खंडित होणाऱ्या वीजपुरवठा सुरळीत होण्याबाबत निवेदन दिले.

या निवेदनातील मागणीनुसार तालुक्यातील कोळवण खोरे, रिहे खोरे, भादस खोरे, माले खोरे, मुठा खोरे, पूर्वेकडील भुकूम, भूगाव, पिरंगुट, हिंजवडी, माण भागातून वारंवार वीजपुरवठा खंडित होण्याबाबत मनसेकडे तक्रारी प्राप्त होत आहे. या तक्रारीवरून महाराष्ट्र नवनिर्माण मुळशीतील पदाधिकाऱ्यांनी महावितरणकडे निवेदन दिले. पावसाळ्यात काही दुर्गम भागात दोन-दोन दिवस वीज गायब असते. याची दखल घेतली जावी. वरील सर्व मागण्यांची दखल येत्या आठ दिवसांत घ्यावी, अन्यथा महावितरणच्या भरे येथील कार्यालयात आंदोलन करू, असा इशारा देण्यात आला.
महाराष्ट्र नवनिर्माण मुळशीचे अध्यक्ष धनंजय टेमघरे, उपाध्यक्ष गणेश शिंदे, संघटक सोमनाथ कवडे, माथाडी कामगार सेनेचे उपाध्यक्ष संजय देवकर व इतर पदाधिकारी व कार्यकर्ते उपस्थित होते.

महाराष्ट्र नवनिर्माण सेनेचे निवेदन प्राप्त झाले असून यातील मागण्यांवर आम्ही या अगोदरच काम सुरू केले आहे. तालुक्यातील विजेबाबतची पावसाळ्यापूर्वीची पूर्ण करावयाची कामे आम्ही हाती घेतली आहेत.
- आनंद घुले, उपअभियंता, महावितरण, मुळशी