कोळवण, ता. ८ : साठेसाई (ता. मुळशी) गावचा सुपुत्र सुप्रसिद्ध चित्रकार विश्वनाथ खिलारी यांच्या चित्रांचे प्रदर्शन पी. एन. गाडगीळ अँन्ड सन्स, हॅप्पी कॉलनी, कोथरूड येथील कलादालनात येत्या मंगळवारपासून (ता. ११) ते (ता. १६) जून पर्यंत सकाळी अकरा ते सायं. साडेसात वाजेपर्यंत सर्वांना विनामूल्य पाहता येईल.
यामध्ये निसर्गाचा सुंदर आविष्कार आपणास पहावयास मिळणार असून गावाकडील सुंदर पहाट, सकाळची कोवळी किरणे आणि झाडं पानाफुलांचे सुंदर रेखाटन या प्रदर्शनात पाहायला मिळणार आहे.
‘मयूर’ नावाने भरणारे हे प्रदर्शन मोरांच्या अनोख्या दुनियेमध्ये आपल्याला घेऊन जाणार असून ही चित्र तयार करताना जलरंग, ॲक्रेलिक कलर यांचा पेपर व कॅनव्हास वर सुंदर वापर केलेला आहे. या प्रदर्शनाचे उद्‍घाटन मंगळवारी सायंकाळी ७ वाजता ज्येष्ठ चित्रकार प्रा. मिलिंद फडके आणि लेखक व इतिहास संशोधक अनिकेत यादव यांच्या हस्ते होणार आहे. या प्रदर्शनाला संस्कार भारतीचे प्रफुल्ल भिष्णुरकर, लीना आढाव, रमेश खडबडे, संतोष देवे, धीरज दीक्षित आदी मान्यवर उपस्थित राहणार आहेत.
तरी हे चित्रप्रदर्शन पाहण्यासाठी चित्रप्रेमींनी आवर्जून उपस्थित राहण्याचे आवाहन चित्रकार विश्वनाथ खिलारी यांनी केले आहे. विश्वनाथ यांनी काढलेले विठ्ठलाचे सुप्रसिद्ध चित्र मागील काही वर्षांपासून आषाढी वारीकाळात तर संपूर्ण वृत्त वाहिन्यांवर तसेच जवळपास सर्व वर्तमान पत्रात प्रसिद्ध झाले आहे.