कोळवण, ता. १८ : पौड-कोळवण (ता. मुळशी) रस्त्यावर प्र. जि. मा. २६ वर नांदगाव येथील माऊली मंगल कार्यालयाच्या शेजारी मोठे भगदाड पडले आहे. अतिशय वर्दळ असणाऱ्या या रस्त्यावर मोठा खड्डा पडल्याने एखाद्या वाहनाचा अपघात होण्याची शक्यता नाकारता येत नाही आणि जर असा एखादा अपघात झाला तर याला जबाबदार कोण? असा सवाल नागरिक करत आहेत,
या खड्ड्याचे आसपासच्या भागातील रस्ता खचला असून वरून रस्त्याचे डांबरीकरण केलेले आवरण फक्त शिल्लक आहे व रस्त्याचे खाली पोकळ जमीन नजरेने स्पष्ट दिसत आहे.
पौड कोळवण काशिग रस्ता हा साधारण दोन वर्षांपूर्वी सुमारे नऊ कोटी रूपये खर्च करून तयार केला आहे. अवघ्या दोनच वर्षांत जर या रस्त्यावर असे खड्डे पडले तर यावरूनच कल्पना येते की या रस्त्याचे काम कसे झाले असेल, हा संशोधनाचा विषय असेल. बांधकाम विभागास या रस्त्यावर पडलेल्या खड्ड्यांची कल्पना तरी आहे का? हा खड्डा लांबून दिसत नाही तर रात्रीच्यावेळी या खड्ड्यात वाहन अडकून अपघात झाला व एखाद्या निष्पापाचा त्यात बळी गेल्यानंतरच बांधकाम विभाग जागे होणार आहे का?
सार्वजनिक बांधकाम विभागाकडून या खड्ड्याची पाहणी होऊन त्वरित दुरुस्ती करण्यात यावी, अशी मागणी येथील ग्रामस्थांनी केली आहे. या खड्ड्याचे बाबतीत सार्वजनिक बांधकाम विभागाच्या संकेत साळुंखे यांना संपर्क करून विचारले असता त्यांनी सांगितले की, खड्ड्याची पाहणी करून लवकरच त्यामध्ये भराव टाकून खड्डा भरून घेण्यात येईल.