कोळवण, ता.२७ : चिखलगाव (ता . मुळशी) येथील प्रगतशील शेतकरी लहू मारुती फाले यांनी दहा वर्षांपासून शेतात केलेल्या सेंद्रिय शेतीची दखल महाराष्ट्राचे राज्यपाल आचार्य देवव्रत यांनी घेतली व त्यांचा पुणे येथे बुधवारी (ता. १९) सत्कार केला.
पुण्यातील शिवाजीनगर येथील कृषी विद्यालयाच्या शिरनामे येथील सभागृहात आयोजित पंतप्रधान सन्मान निधी वितरण समारंभ कार्यक्रमात फाले यांना गौरविण्यात आले. यावेळी कृषी विभागाचे प्रधान सचिव विकासचंद्र रस्तोगी, कृषी आयुक्त सूरज मांढरे, जिल्हा कृषी अधीक्षक संजय काचोळे, तालुका कृषी अधिकारी हनुमंत खाडे, दत्तात्रेय मेंगडे उपस्थित होते.
यावेळी बोलताना राज्यपाल म्हणाले की, राज्यात काही शेतकऱ्यांनी नैसर्गिक व सेंद्रिय शेती करून स्वतःचे नवनवीन शोध लावले आहेत एक प्रकारे ते शास्त्रज्ञांचे काम करीत आहेत त्यांचा शोध इतरांना मार्गदर्शक आहे.
फाले यांनी सांगितले की, देशी भात वाणांचे संवर्धन करणे व आंबे मोहोर भात लागवड करणे तसेच निळा भात लागवड हा प्रयोग यशस्वी करून दाखविला. त्यामुळे तालुक्यात प्रथम नावीन्यपूर्ण उपक्रम म्हणून नावलौकिक मिळवला. मी गट शेतीस प्रोत्साहन देत असून आमचा वसुंधरा शेतकरी गट आहे. यात १४ सभासद आहेत. आम्ही सेंद्रिय पद्धतीने भात, गहू, कडधान्य व भाजीपाला उत्पादित करतो.

02713