शिक्रापूर, ता. ४ : पुणे-नगर महामार्गावरील शिक्रापूर (ता. शिरूर) येथील पाबळ चौकात असलेल्या एका लॉजवर सुरू असलेल्या बेकायदा वेश्या व्यवसायप्रकरणी वेश्या व्यवसाय करणारी संबंधित महिला व राकेश नामक एका व्यक्तीस ताब्यात घेऊन त्यांच्यावर गुन्हे दाखल केले.
याबाबत शिक्रापूर पोलिसांनी माहिती दिली की, शिक्रापूर येथील पाबळ चौक परिसरातील ऐश्वर्या लॉजवर एक व्यक्ती एका महिलेकडून वेश्याव्यवसाय करून घेत असल्याची माहिती पोलिस निरीक्षक दीपरतन गायकवाड यांना एका गोपनीय स्रोतांकडून मिळाली. त्यावर पोलिस उपनिरीक्षक महेश डोंगरे, पोलिस हवालदार श्रीमंत होनमाने, अमोल दांडगे, रोहिदास पारखे, विकास पाटील, महिला पोलिस शिपाई रूपाली खोटे यांच्या पथकाने या ठिकाणी एक बनावट ग्राहक पाठवून पाहणी केली असता एक महिला वेश्याव्यवसाय करत असल्याचे निदर्शनास आले. स्थानिक पंचासमक्ष पोलिसांनी या महिलेला ताब्यात घेत कारवाई केली. याबाबत शिक्रापूर पोलिस ठाण्याचे पोलिस हवालदार श्रीमंत सर्जेराव होनमाने (रा. शिक्रापूर) यांनी फिर्याद दिली. पोलिसांनी वेश्याव्यवसाय चालवणाऱ्या राकेश (पूर्ण नाव पत्ता माहीत नाही) याच्यासह संबंधित महिलेवर बेकायदा वेश्या व्यवसाय केल्याचा गुन्हा दाखल केला. संबंधित महिलेची रवानगी पुण्यातील महिला सुधारगृहात केली. शिक्रापूर हद्दीत कुठेही बेकायदा वेश्या व्यवसाय चालू देणार नसल्याचाही पुनरुच्चार पोलिस निरीक्षक दीपरतन गायकवाड यांनी बोलून दाखविला.