सणसवाडी, ता. ८ : उद्योगनगरी सणसवाडीत (ता.शिरूर) बुधवारी (ता.७) दोन रानगवे लोकवस्तीत घुसले. यामुळे ग्रामस्थांना चांगलीच पळापळ करावी लागली. वनविभागाला याबाबत त्वरित कळविल्याने पुणे-अहिल्यानगर महामार्गावरील वाहतूक थांबविण्यात आली. पोलिस व वनविभागाच्या अधिकाऱ्यांना हे गवे पुन्हा वनविभाग क्षेत्रात हुसकून लावण्यात यश आले.
सणसवाडी (ता.शिरूर) येथे सोमवारी (ता.५) दोन भलेमोठे रानगवे आढळून आले. काही वेळ नागरीवस्तीत त्यांचा विहार राहिल्यानंतर ते पुन्हा गायब झाले. मात्र, बुधवारी (ता.७) पुन्हा सकाळच्याच सुमारास अचानकपणे थेट पुणे-अहिल्यानगर महामार्गालगतच्या नागरी वस्तीतच ते फिरू लागल्याने स्थानिकांमध्ये एकच खळबळ उडाली. अचानक झालेल्या या प्रकारामुळे गव्यांना पाहण्यासाठी नागरिकांची गर्दी केली. गर्दीच्या गोंगाटामुळे दोन्ही रानगवे घाबरून सैरभैर होऊन पळू लागले. यामुळे नागरिकांचीही पळापळ झाली. याबाबत स्थानिकांनी शिक्रापूर पोलिसांना तसेच शिरूर वनविभागाला सदर माहिती देताच वन परिक्षेत्र अधिकारी निळकंठ गव्हाणे, वनपाल गौरी हिंगणे, वनरक्षक बबन दहातोंडे, वनमजूर आनंदा हरगुडे, वनविभाग रेस्क्यू टीम मेंबर व निसर्ग वन्यजीव सामाजिक संस्थेचे अध्यक्ष शेरखान शेख, अमोल कुसाळकर, शुभम वाघ, नेचर गार्ड ऑर्गनायझेशन संस्थेचे अध्यक्ष गणेश टिळेकर, शुभांगी टिळेकर, बाळासाहेब मोरे, वैभव निकाळजे, श्रीकांत भाडळे, राहुल गायकवाड यांनी एकत्रितपणे रानगवे असलेल्या परिसरात तातडीने धाव घेतली.
यावेळी पोलिस हवालदार उद्धव भालेराव, दामोदर होळकर, वॉर्डन बाळासाहेब शेलार यांच्यासह स्थानिकांच्या मदतीने पुणे-अहिल्यानगर महामार्गावरील वाहतूक काही काळ थांबविण्यात आली. नागरी वस्तीतील दोन्ही रानगवे जवळच असलेल्या गवे वनविभागाच्या जंगली भागात नेण्यात सर्वांना यश आले.

04694