शिक्रापूर, ता. ५ : कोंढापुरी (ता. शिरूर) येथील पुणे-अहिल्यानगर महामार्गालगत एका पेट्रोल पंपासमोर काही दिवसांपूर्वी कारमध्ये झोपलेल्या दांपत्याला कोयत्याच्या धाकाने लुटणाऱ्या तीन आरोपींना शिक्रापूर पोलिस व स्थानिक गुन्हे शाखेने अटक केली. न्यायालयाने त्यांची रवानगी न्यायालयीन कोठडीत केली आहे.
आकाश पांडुरंग शिंदे, महेश मनाजी शिंदे व राहुल रामदास पवार असे कोठडीत रवानगी केलेल्यांचे नाव आहे.
पोलिसांनी दिलेली माहिती अशी की, ता. ४ जूनला पुणे-अहिल्यानगर महामार्गावरील कोंढापुरी येथून सोपान आंधळे हे मोटारी (एम एच ०१ बी यु ०३६६)तून पत्नी व मुलीसह पुण्याच्या दिशेने प्रवास करत असताना त्यांना झोप येऊ लागल्याने ते येथील सूरज पेट्रोल पंपासमोर मोटार उभी करून झोपलेले असताना, पहाटेच्या सुमारास एका दुचाकीहून आलेल्या तिघांनी आंधळे यांच्या कारचा दरवाजा वाजवून त्यांना कोयत्याचा धाक दाखवत त्यांच्या खिशातील ५०० रुपये व पत्नी प्राजक्ता आंधळे यांच्या गळ्यातील दीड तोळे वजनाचे सोन्याचे गंठन काढून घेऊन पोबारा केला होता. याबाबत सोपान राधाकिसन आंधळे (वय ३३, रा.शेवगाव, ता.शेवगाव, जि.अहिल्यानगर) यांनी शिक्रापूर पोलिस ठाण्यात फिर्याद दिल्याने पोलिसांनी अज्ञात आरोपींवर गुन्हा दाखल केला होता.
या गुन्ह्याचा तपास करत असताना आरोपी हे अहिल्यानगर जिल्ह्यातील असल्याची प्राथमिक माहिती शिक्रापूर पोलिसांसह स्थानिक गुन्हे शाखेच्या पथकाला मिळाली. त्यानुसार स्थानिक गुन्हे शाखेचे जनार्दन शेळके, संजू जाधव, तुषार पंदारे, राजू मोमीन, सागर धुमाळ तसेच शिक्रापूरचे पोलिस उपनिरीक्षक महेश डोंगरे, विजय मस्कर, पोलिस हवलदार जयराज देवकर, शिवाजी चितारे, अमोल दांडगे यांनी अहिल्यानगर जिल्ह्यात जाऊन संशयित आरोपींना ताब्यात घेऊन त्यांच्याकडे चौकशी केली असता, त्यांनी गुन्ह्याची कबुली दिल्याने त्यांना अटक करण्यात आली.

तीनही आरोपी हे सराईत गुन्हेगार असून त्यांनी पुणे-अहिल्यानगर महामार्गावरील पुणे जिल्ह्याच्या हद्दीत येऊन अनेक गुन्हे केल्याचे निष्पन्न झाले असून त्याचाही तपास सुरू आहे.
- विजय मस्कर, पोलिस उपनिरीक्षक, शिक्रापूर (ता. शिरूर)