शिक्रापूर, ता. १९ : ‘रागाने का बघतो,’ असे म्हणत येथील अमर भुजबळ या युवकाला शिवीगाळ, दमदाटी केली व त्याच्या चारचाकीचे मोठे नुकसान कोंढापुरी (ता.शिरूर) येथील युवकांनी केले.
संघर्ष गायकवाड असे आरोपी युवकाचे नाव असून, आरोपींमध्ये आणखी दोन अनोळखी युवक असल्याची माहिती शिक्रापूर पोलिसांनी दिली. याबाबत शिक्रापूर पोलिसांनी सांगितले की, येथील अमर भुजबळ (वय २८, रा.तळेगाव रोड, शिक्रापूर, ता.शिरूर) हा मंगळवारी (ता.१७) येथील पुणे-अहिल्यानगर महामार्गावरील महादेव मंदिरात देवदर्शनासाठी गेलेला होता. तो मंदिरातून बाहेर येताच तो शेजारील एका हॉटेलात चहा पिण्यासाठी थांबला. यावेळी सिगारेट ओढत उभ्या असलेल्या तिघा युवकांनी अमरला आमच्याकडे रागाने का बघतो? असे म्हणत थेटपणे शिवीगाळ व दमदाटी करून दगडाने बेदम मारहाण केली. याबाबत पोलिस ठाण्याकडे तक्रार देण्यासाठी निघाला असताना युवकांनी त्याचा दुचाकीवरून पाठलाग केला आणि शिक्रापूर पोलिस ठाण्यासमोर अडवून त्याच्या मोटारीची काच फोडून नुकसान केले. याप्रकरणी शिक्रापूर पोलिस ठाण्यात संघर्ष गायकवाड (रा.कोंढापुरी, ता.शिरूर, जि.पुणे) याच्यासह दोन अनोळखी युवकांवर गुन्हा दाखल केला आहे.