शिक्रापूर, ता. २२ पुणे- अहिल्यानगर महामार्गावरील कासारी फाटा (ता. शिरूर) येथे महामार्गालगत असलेल्या जमिनीच्या वादातून दोन युवकांच्या गटात हाणामारी झाली. याबाबत शिक्रापूर पोलिसांनी विक्रम कांतिलाल रासकर, गणेश बबन ब्राम्हणे, महेश बबन ब्राम्हणे, पृथ्वीराज पिसाळ यांच्यासह एका अनोळखी युवकावर परस्परविरोधी तक्रारींनुसार गुन्हे दाखल केले.
याबाबत शिक्रापूर पोलिसांनी सांगितले की, कासारी फाटा येथे पुणे-अहिल्यानगर महामार्गालगत महेश ब्राम्हणे यांच्या मालकीची जमीन असून, या जमिनीच्या खरेदीच्या कारणाने यापूर्वी विक्रम रासकर व महेश ब्राम्हणे यांच्यामध्ये काही वाद झालेले होते. या वादाच्या पार्श्वभूमिवर नुकतेच ब्राम्हणे व रासकर हे दोघेही सदर जमिनीचे ठिकाणी एकाच वेळी आल्याने त्यांच्यात पुन्हा वाद सुरू झाला. हा वाद वाढत जाऊन दोघांनीही एकमेकांना मारहाण केल्याचा आरोप करत दोघेही शिक्रापूर पोलीस ठाण्यात आले. दोघांनीही एकमेकांच्या विरोधात फिर्यादी दिल्या.
याबाबत गणेश बबन ब्राम्हणे (वय ४०, रा. इकोग्राम सोसायटी, ता. शिरूर) व विक्रम कांतिलाल रासकर (वय ३९, रा. रासकर मळा, कासारी) या दोघांनी शिक्रापूर पोलिस ठाण्यात एकमेकांच्या विरोधात फिर्यादी दिल्याने पोलिसांनी विक्रम कांतिलाल रासकर, गणेश बबन ब्राम्हणे व महेश बबन ब्राम्हणे (दोघेही रा. इकोग्राम सोसायटी), पृथ्वीराज पिसाळ (रा. वाई, जि. सातारा) यांच्यासह एका अनोळखी युवकावर गुन्हा दाखल केला. पुढील तपास पोलीस हवालदार अतुल पखाले व नरेंद्र गायकवाड हे करीत आहेत.