शिक्रापूर, ता. २५ : शिरूर तालुक्यातील शिक्रापुरातील तळेगाव रस्त्यावर किरकोळ अपघाताच्या वादातून २० जणांच्या टोळक्याने ‘कोयता गँग’चे नाव सांगत कपडा व्यापाऱ्याच्या दुकानात शिरून दोन भावांना जबर मारहाण केली. या टोळक्याने दुकानातील ७० हजार रुपये आणि सोनसाखळी लंपास केली असून, या घटनेमुळे परिसरात मोठी दहशत पसरली आहे.
येथील ‘एसआर ब्रँड हब’चे संचालक श्रीकांत नरके हे मोटारीने दुकानासमोर येत असताना दुचाकीने त्यांच्या मोटारीला धडक दिली. याचा जाब विचारल्याने दुचाकीवरील आर्यन गडदरे व सार्थक गावडे यांनी त्यांच्या २०-२२ मित्रांना बोलावून घेतले. या टोळक्याने ‘आम्ही कोयता गँगचे आहोत’ असे ओरडत श्रीकांत नरके व त्यांचे भाऊ राजेश यांना लाथाबुक्क्यांनी मारहाण केली. तसेच कोयत्याने मारण्याची धमकी देत दुकानातील रोकड व दागिने पळवले. ही सर्व घटना सीसीटीव्ही कॅमेऱ्यात कैद झाली आहे. याप्रकरणी श्रीकांत नरके (वय ३५, रा. नरकेवाडी) यांनी दिलेल्या फिर्यादीवरून शिक्रापूर पोलिसांनी आर्यन गडदरे, सार्थक गावडे, अथर्व साळवे, कार्तिक सावंत, क्रिष चकोर, ओम गायकवाड, सार्थक कराळे, सोहम फिरोदिया व इतर १२ जणांवर गुन्हा दाखल केला आहे. पुढील तपास पोलिस हवालदार बापू हाडगळे करत आहेत.

शिक्रापूर हद्दीत कोणतीही गँग सक्रिय नाही. कुणी गँगचे नाव सांगून दहशत माजवत असेल, तर त्यांचा कडक बंदोबस्त केला जाईल. नागरिकांनी न घाबरता थेट तक्रार करावी, पोलिस कडक पावले उचलत आहेत.
- दिपरतन गायकवाड, पोलीस निरीक्षक, शिक्रापूर