कुरुळी, ता. १७ : खेड तालुक्याच्या दक्षिण भागातील सर्व ग्रामपंचायत, सोसायटी, प्राथमिक शाळा, माध्यमिक विद्यालय शासकीय कार्यालयात स्वातंत्र्यदिन साजरा करण्यात आला. ग्रामपंचायत, जिल्हा परिषद प्राथमिक शाळा, अंगणवाडी, तलाठी ऑफिस, माध्यमिक विद्यालय, खासगी इंग्रजी माध्यमांच्या शाळा येथे तीन रंगांची विद्युत रोषणाई करण्यात आली.
तसेच सांस्कृतिक कार्यक्रम आयोजित करण्यात आले होते. चाकण वाहतूक विभाग, एमआयडीसी परिसरातील विविध कारखान्यात ध्वजवंदन करण्यात आले. मोई येथील जिल्हा परिषदेच्या प्राथमिक शाळेला खासगी कंपनीने सीएसआर फंडातून वर्ग खोल्या, संगणक कक्षा, अंगणवाडी, मुला- मुलींसाठी स्वतंत्र बाथरूम, क्रीडांगण सुशोभीकरण करून तीन मजली इमारतीचे लोकार्पण आमदार बाबाजी काळे यांच्या हस्ते करण्यात आले.
कुरुळी (ता. खेड) ग्रामपंचायतीचे ध्वजवंदन सरपंच अनिता बधाले, उपसरपंच सुनीता बागडे यांच्या हस्ते करण्यात आले. तसेच मोई ग्रामपंचायतीचे सरपंच शीलाताई रोकडे, उपसरपंच सोमनाथ गवारी व निघोजे ग्रामपंचायतीचे सरपंच सुनीता येळवंडे, उपसरपंच दीपक कांबळे यांनी ध्वजवंदन केले. महाळुंगे एमआयडीसी पोलिस ठाण्याचे ध्वजवंदन वरिष्ठ पोलिस निरीक्षक दिगंबर सूर्यवंशी यांच्या हस्ते करण्यात आले.