काटेवाडी, ता. ३० : केंद्र शासन संकल्पित विकसित कृषी संकल्प २०२५ या शेतकरी अभियानाची सुरुवात बारामती तालुक्यातील सहा गावांमधून गुरुवारपासून (ता. २९) करण्यात आली. कोऱ्हाळे बुद्रुक (ता. बारामती) येथे शेतकऱ्यांना कृषी तज्ज्ञांनी मार्गदर्शन केले.

महाराष्ट्र शासन कृषी विभाग, कृषी तंत्रज्ञान व्यवस्थापन यंत्रणा पुणे, राष्ट्रीय कृषी संशोधन परिषद नवी दिल्ली अंतर्गत राष्ट्रीय अजैविक ताण प्रबंधन संस्था माळेगाव खुर्द, कृषी विज्ञान केंद्र बारामती, महात्मा फुले कृषी विद्यापीठ राहुरी, शासकीय पशू वैद्यकीय महाविद्यालय शिरवळ यांचे संयुक्त विद्यमाने या अभियानाची सुरुवात बारामती तालुक्यामधून करण्यात आली.
अभियानाच्या माध्यमातून कृषी विज्ञान केंद्राचे शास्त्रज्ञ डॉ. रतन जाधव यांनी शेतकऱ्यांच्या अडीअडचणी समजून घेऊन त्यावर नवनवीन तंत्रज्ञानाची जोड देऊन शेतकऱ्यांच्या शंकांचे निरसन करण्यात आले. राष्ट्रीय अजैविक तान प्रबंधन संस्था माळेगाव बुद्रुकच्या प्रमुख सूक्ष्म जीव शास्त्रज्ञ डॉ. रिंकू डे व वरिष्ठ वनस्पती रोग शास्त्रज्ञ डॉ. वनिता साळुंखे सद्यस्थितीत पिकांचे नुकसान होण्यापासून वाचण्यासाठी काय काळजी घ्यावी. याबाबत मार्गदर्शन करण्यात आले. महात्मा फुले कृषी विद्यापीठाचे सहाय्यक प्राध्यापक डॉ. विकास भालेराव यांनी विद्यापीठांतर्गत तयार करण्यात आलेल्या नवनवीन वानांची व त्या वानांच्या वैशिष्ट्यांविषयी सविस्तर माहिती दिली.

यावेळी तालुका कृषी अधिकारी सुप्रिया बांदल यांच्या मार्गदर्शनाखाली मंडळ कृषी अधिकारी हिंदुराव मोरे, सुभाष बोराटे, आत्माचे सहाय्यक तंत्रज्ञान व्यवस्थापक गणेश जाधव, उप कृषी अधिकारी प्रवीण माने, प्रताप कदम, रणजीत धुमाळ, मिथुन बोराटे, संगीता गावडे, मनीषा यादव कृषी विज्ञान केंद्र बारामतीचे धीरज शिंदे, विषय विशेषज्ञ संतोष गोडसे, प्रकल्प सहाय्यक किरण मदने, प्रशांत गावडे, आकाश वळकुंदे आदी अधिकारी कर्मचारी वर्गाने कार्यक्रम यशस्वीरित्या पार पाडला.

अभियानामध्ये शेतीमधील आधुनिक तंत्रज्ञान, ऊस शेतीमध्ये कृत्रिम बुद्धिमत्तेचा वापर (AI), कापूस लागवड तंत्रज्ञान, शासकीय योजना, माती परीक्षण, फळबाग रोपे व भाजीपाला रोपे, शेतकरी बचत गटांचे कार्य जबाबदाऱ्या तसेच शेतकरी उत्पादक कंपनी काळाची गरज अशा विविध विषयांवर सविस्तर मार्गदर्शन करण्यात येत आहे.
- गणेश जाधव, सहाय्यक तंत्रज्ञान व्यवस्थापक, आत्मा

00931