काटेवाडी, ता. १४ : जिल्ह्यात जून २०२५ च्या पहिल्या दोन आठवड्यांत सरासरीच्या ४३.४ टक्के पाऊस नोंदवला गेला आहे. शिरूर आणि दौंड तालुक्यांत खरिपाच्या पेरण्यांना गती मिळाली असली, तरी पश्चिम भागातील वेल्हे, भोर, मुळशी आणि मावळ या तालुक्यांतील शेतकरी मॉन्सूनच्या जोरदार हजेरीची वाट पाहत आहेत.

भारतीय हवामान खात्याच्या पुणे विभागाच्या ताज्या अहवालानुसार, १६-१८ जून दरम्यान पश्चिम महाराष्ट्रात मध्यम ते मुसळधार पावसाची शक्यता आहे. खात्याने १३ जून २०२५ रोजी जिल्ह्यासाठी ऑरेंज अलर्ट जारी केला होता, ज्यामुळे काही ठिकाणी मध्यम स्वरूपाचा पाऊस आणि ४०-६० किमी प्रतितास वेगाने वादळी वारे वाहण्याची शक्यता वर्तवली होती. शिरूर तालुक्यात जून महिन्याच्या सरासरीच्या १२७.५ टक्के पाऊस नोंदवला गेला आहे. येथे १४ जून रोजी ४२.० मिलिमीटर पाऊस पडला, तर एकूण ११४.९ मिलिमीटर पावसाची नोंद झाली. यामुळे शिरूरमधील शेतकऱ्यांना भात, बाजरी आणि सोयाबीनच्या पेरणीसाठी अनुकूल वातावरण मिळाले आहे.
दौंड तालुक्यात सरासरीच्या ९४ टक्के पाऊस झाला असून, १४ जून रोजी ३४.० मिलिमीटर पाऊस पडला आणि एकूण ८९.२ मिलिमीटर पावसाची नोंद आहे. येथील शेतकऱ्यांनी मका आणि इतर पिकांच्या पेरणीला सुरुवात केली आहे.
पुणे शहरात १४ जून रोजी ५८.८ मिलिमीटर पाऊस पडला असून, जून महिन्याचा एकूण पाऊस ११६.१ मिलिमीटर आहे. पश्चिम भागातील वेल्हे (११ टक्के), मावळ (४२ टक्के), भोर (३३.७ टक्के) आणि मुळशी (३०.२ टक्के) या तालुक्यांमध्ये कमी पावसामुळे खरीप पिकांच्या पेरण्या रखडल्या आहेत. हवामान खात्याने १६-१८ जून दरम्यान पश्चिम महाराष्ट्रात मध्यम ते मुसळधार पावसाचा अंदाज वर्तवला आहे, ज्यामुळे या तालुक्यांतील शेतकऱ्यांना दिलासा मिळण्याची शक्यता आहे.

अशी आहे सध्याची स्थिती
१. जुन्नर, आंबेगाव, खेड, शिरूर, बारामती, इंदापूर, दौंड आणि पुरंदर या तालुक्यांमध्ये पावसाची स्थिती समाधानकारक आहे.
२. बारामती आणि इंदापूरमध्ये खंडित स्वरूपाचा पाऊस पडत आहे
३. शेतकऱ्यांनी खरीप पेरण्यांच्या कामांना गती दिली आहे.
४. बारामतीत १४.८ मिलिमीटर आणि इंदापूरमध्ये ६.५ मिलिमीटर पावसाची १४ जूनला नोंद.
५. जून महिन्याचा पहिल्या १५ दिवसांत एकूण पाऊस अनुक्रमे ६७.५ मिलिमीटर आणि ५६.२ मिलिमीटर.

पुढील आठवड्यात वाढणार पावसाचा जोर
जिल्ह्याचा सरासरी पाऊस १४ जून रोजी २३.८ मिलिमीटर नोंदवला गेला, तर जून महिन्याचा आत्तापर्यंत एकूण पाऊस ७६.५ मिलिमीटर आहे. हवामान खात्याच्या अंदाजानुसार, पुढील आठवड्यात पावसाचा जोर वाढेल, ज्यामुळे खरिपाच्या पेरण्यांना गती मिळेल.
------------------------------------------------
तालुका..........१४ जूनचा पाऊस..... जून महिन्यातील आतापर्यंचा पाऊस
हवेली..............३४.४..........८९.८
मुळशी..............३६.१..........८४.१
भोर...................६.१........६९.२
मावळ................३४.७.........९४.३
वेल्हे.................६.१..........५१.२
जुन्नर..................१३.५........५२.७
खेड.................२१.०........६०.८
आंबेगाव.............२२.७............५७.४
शिरूर................४२.०..........११४.९
बारामती.............१४.८.............६७.५
इंदापूर................६.५............५६.२
दौंड...................३४.०..........८९.२
पुरंदर.................१२.८...........६८.०