काटेवाडी, ता. ८ : राज्यातील शेतकऱ्यांसाठी कृषी विभागाने २०२५-२६ साठी खरीप आणि रब्बी हंगामातील १६ पिकांसाठी राज्यांतर्गत पीकस्पर्धा जाहीर केली आहे. नावीन्यपूर्ण शेती, उत्पादकता वाढवण्याच्या उद्देशाने आयोजित या स्पर्धेत सहभागी होऊन शेतकरी तालुका, जिल्हा आणि राज्यस्तरावरील आकर्षक बक्षीसे जिंकू शकतात.

पीकस्पर्धेचा मुख्य उद्देश शेतकऱ्यांना आधुनिक आणि नावीन्यपूर्ण शेती पद्धतींचा अवलंब करण्यास प्रोत्साहन देणे, पिकांची उत्पादकता वाढवणे आणि शेतकऱ्यांच्या उत्कृष्ट कामगिरीला मान्यता देऊन त्यांचा सन्मान करणे हा आहे. यामुळे शेतकऱ्यांमधील स्पर्धात्मक भावना वाढून शेती क्षेत्रात नवे प्रयोग आणि तंत्रज्ञानाचा वापर वाढेल, ज्याचा फायदा एकूणच शेती अर्थव्यवस्थेला होईल. यामध्ये अन्नधान्य, कडधान्य आणि गळीतधान्य या गटातील खरीप हंगामातील ११ पिके आणि रब्बी हंगामातील पाच पिकांचा समावेश आहे.

सहभागाची मुदत
मूग आणि उडीद.............. ३१ जुलै २०२५ पर्यंत
भात, ज्वारी, बाजरी, मका, नाचणी (रागी), तूर, सोयाबीन, भुईमूग, सूर्यफूल........३१ ऑगस्ट २०२५ पर्यंत
रब्बी हंगामातील ज्वारी, गहू, हरभरा, करडई, जवस..........३१ डिसेंबर २०२५ पर्यंत

बक्षिसांची रचना
स्तर......पहिले बक्षीस....दुसरे बक्षीस.....तिसरे बक्षीस
तालुका.....५,००० .......३,०००...........२,०००
जिल्हा......१०,००० ......७,००० .........५,०००
राज्य........५०,००० ......४०,००० .......३०,०००

अशी होईल विजेत्यांची निवड
सर्वसाधारण आणि आदिवासी गटांसाठी तालुकास्तरावर आयोजित स्पर्धेत शेतकऱ्यांनी साधलेली उत्पादकता आधारभूत मानून राज्य, जिल्हा आणि तालुका स्तरावरील विजेत्यांची निवड होईल.

स्पर्धेच्या सविस्तर मार्गदर्शक सूचना www.krishi.maharashtra.gov.in या संकेतस्थळावर उपलब्ध आहेत. कृषी विभागाने शेतकऱ्यांना मोठ्या संख्येने सहभागी होण्याचे आवाहन केले आहे.
-----------------------