काटेवाडी, ता. ३० : द्राक्ष, डाळिंब, ऊस, मका, ज्वारी, सोयाबीन आणि कापूस या प्रमुख पिकांवरील कीटक आणि रोगाच्या प्रादुर्भावासंदर्भात पुणे कृषी आयुक्तालयातील कृषी संचालक र. शा. नायकवाडी यांनी पत्र दिले आहेत. वृत्तपत्रांमधील बातम्या आणि ‘क्रॉपसॅप’ पोर्टलवरील अहवालांमधील तफावत लक्षात घेऊन, प्रादुर्भावग्रस्त भागात निवडक निरीक्षणे नोंदविण्याचे आणि तातडीने उपाययोजना करण्याचे निर्देश याद्वारे दिले आहेत.
कृषी आयुक्तालयाने नमूद केल्यानुसार, स्थानिक आणि राष्ट्रीय वृत्तपत्रांमधून कीटक आणि रोगांच्या प्रादुर्भावासंदर्भात वारंवार बातम्या प्रसिद्ध होत आहेत. मात्र, ‘क्रॉपसॅप’ पोर्टलवरील अहवालांमध्ये अनेकदा प्रादुर्भावाची नोंद नसल्याचे आढळून येते. यामुळे क्षेत्रीय स्तरावरील अधिकाऱ्यांना ‘क्रॉपसॅप’ निरीक्षणे काळजीपूर्वक नोंदविण्याचे आणि प्रभावी नियंत्रणासाठी तातडीने कार्यवाही करण्याचे आदेश दिले आहेत. कृषी संचालक नाईकवाडी यांनी दिलेल्या आदेशानुसार, वृत्तपत्रांमधून किंवा इतर प्रसारमाध्यमांमधून कीटक आणि रोगांबाबत बातम्यासमोर आल्यास उपकृषी अधिकारी, मंडळ कृषी अधिकारी आणि तालुका कृषी अधिकारी यांनी तातडीने संभाव्य प्रादुर्भावग्रस्त क्षेत्रात निवडक निरीक्षणे नोंदवावीत. तसेच, कृषी विद्यापीठ आणि कृषी विज्ञान केंद्रातील शास्त्रज्ञ व क्षेत्रीय अधिकाऱ्यांच्या भेटींचे आयोजन करून शेतकऱ्यांना मार्गदर्शन करण्यात यावे. याशिवाय, कीटक आणि रोगांचे व्यवस्थापन प्रभावीपणे करण्यासाठी प्रसारमाध्यमांद्वारे व्यापक जनजागृती करण्याचे निर्देशही दिले आहेत. शेतकऱ्यांनी आपल्या पिकांचे नियमित निरीक्षण करावे आणि संशयास्पद लक्षणे आढळल्यास तातडीने स्थानिक कृषी अधिकाऱ्यांशी संपर्क साधावा. यामुळे कीटक आणि रोगांचा प्रादुर्भाव आर्थिक नुकसान पातळीच्या खाली ठेवण्यास मदत होईल, असे आवाहन कृषी विभागाने केले आहे.