काटेवाडी, ता. ३१ : काटेवाडी (ता. बारामती) येथे दिशा कृषी उन्नती योजनेअंतर्गत बुधवारी (ता. ३०) शेतकरी प्रशांत तुळशीदास काटे यांच्या शेतातील नावीन्यपूर्ण निळ्या केळीच्या लागवडीची पाहणी तालुका कृषी अधिकारी सचिन हाके आणि मंडळ कृषी अधिकारी सुभाष बोराटे यांनी केली. या पाहणी दरम्यान त्यांनी शेतकऱ्यांना ऊस पिकाला पर्याय म्हणून केळी पिकाची मोठ्या प्रमाणात लागवड करण्याचे आवाहन केले. यावेळी सहाय्यक कृषी अधिकारी योगिता सांगळे उपस्थित होत्या.
बारामती तालुक्यामध्ये दिशा कृषी उन्नतीची अभियानाअंतर्गत ऊस पिकाला पर्याय म्हणून केळी लागवड करण्याचे आवाहन कृषी विभागाने केले आहे. याचाच एक भाग म्हणून कृषी विभागाच्या अधिकाऱ्यांनी काटे यांच्या निळ्या केळीच्या प्लॉटची पाहणी केली. निळी केळी, ज्याला ‘ब्ल्यू जावा’ असेही म्हणतात, ही एक दुर्मीळ आणि अनोखी केळीची प्रजात आहे. ही केळी मऊ, गोड आणि व्हॅनिलाच्या चवीसारखी असते, ज्यामुळे तिला आइस्क्रीम केळी’ असेही संबोधले जाते. ही केळी दक्षिण-पूर्व आशियातील आहे आणि तिची लागवड आता भारतातही होऊ लागली आहे. निळ्या केळीच्या झाडांना सावली आणि ओलसर मातीची आवश्यकता असते, ज्यामुळे ती महाराष्ट्रातील काही भागांत लागवडीसाठी योग्य आहे. याशिवाय, या केळीला बाजारात चांगली मागणी असून, शेतकऱ्यांना चांगला नफा मिळवून देण्याची क्षमता आहे.

पाहणी दरम्यान, सचिन हाके यांनी सांगितले, “निळी केळी सारखी नावीन्यपूर्ण पिके शेतकऱ्यांना आर्थिक स्थैर्य देऊ शकतात. ऊस पिकाच्या तुलनेत केळी लागवड कमी खर्चिक आणि फायदेशीर ठरू शकते.” त्यांनी शेतकऱ्यांना ठिबक सिंचन आणि सेंद्रिय शेती पद्धतीचा अवलंब करण्याचेही आवाहन केले.

01173