काटेवाडी, ता. १ : शेतकऱ्यांची शेतमाल वाहतूक सुलभ व्हावी आणि शेती कामासाठी चांगले रस्ते उपलब्ध व्हावेत, यासाठी राज्य शासनाने ‘मातोश्री पाणंद रस्ते’ योजनेतील त्रुटी दूर करण्यावर लक्ष केंद्रित केले आहे. यासाठी महसूलमंत्र्यांच्या अध्यक्षतेखाली २३ सदस्यांची समिती स्थापन केली असून एका महिन्याच्या आत समिती अहवाल शासनाला सादर करेल.
शेतकऱ्यांना पेरणी, कापणी, मळणी यासारख्या शेती कामांसाठी आणि शेतमाल बाजारात नेण्यासाठी बारमाही वापरता येतील असे मजबूत रस्ते आवश्यक आहेत. शेतीत यांत्रिकीकरण वाढल्याने ट्रॅक्टर, हार्वेस्टर यासारख्या यंत्रासाठी चांगल्या दर्जाचे रस्ते गरजेचे आहेत. मात्र, अनेक ठिकाणी शेतरस्ते अतिक्रमित किंवा खराब झाले आहेत. पावसाळ्यात रस्त्यांची दुरवस्था होते आणि देखभालीअभावी शेतकऱ्यांना अडचणींचा सामना करावा लागतो. ‘मातोश्री पाणंद रस्ते’ योजनेअंतर्गत यापूर्वी शेत आणि पाणंद रस्त्यांचे बांधकाम आणि दुरुस्ती करण्यात आली, परंतु या योजनेत काही तांत्रिक आणि व्यवस्थापकीय त्रुटी आढळल्या. त्या दूर करून योजना अधिक प्रभावी राबविण्यासाठी समिती गठित केली. समितीच्या अध्यक्षांना तज्ज्ञ, सेवानिवृत्त अधिकारी किंवा योग्य व्यक्तींना बैठकीसाठी विशेष निमंत्रित म्हणून बोलावण्याचे अधिकार दिले आहेत. तसेच, नमूद कार्यकक्षेव्यतिरिक्त अन्य शिफारशी करण्याचे स्वातंत्र्यही दिले आहे.

समितीच्या पुढील कार्यकक्षा निश्चित
- मातोश्री पाणंद रस्ते योजनेचा सविस्तर अभ्यास करून त्रुटी शोधणे व त्या दूर करण्यासाठी ठोस शिफारशी करणे.
- नागपूर, अमरावती आणि लातूर जिल्ह्यांमध्ये शेतरस्त्यांसाठी राबविलेल्या योजनांचा अभ्यास करून यशस्वी बाबींचा समावेश करणे.
- जमाबंदी आयुक्त आणि संचालक, भूमी अभिलेख, पुणे यांच्या समितीने सादर केलेल्या अहवालानुसार पुढील कार्यवाही करणे.
- शेत आणि पाणंद रस्ते योजनेसाठी स्वतंत्र लेखाशीर्ष स्थापन करावे की नाही, याबाबत शिफारस करणे.
- सध्याच्या योजनेत इतर योजनांशी समन्वय साधून रस्ते पूर्ण होऊ शकतात का आणि त्यासाठी कोणत्या लेखाशीर्षातून किती निधी उपलब्ध करावा, याचे परिमाण ठरविणे.
- पुढील पाच वर्षांत सर्व शेत आणि पाणंद रस्ते शेतकऱ्यांना माल वाहतुकीसाठी उपयुक्त ठरतील, अशा पद्धतीने मजबूत करण्यासाठी उपाययोजना सुचविणे आणि कालबद्ध आराखडा तयार करणे.
- ही योजना कोणत्या विभागामार्फत राबवावी, याबाबत निर्णय घेणे.