काटेवाडी : बारामती येथील जळोची उपबाजारात शेवग्याच्या बाजारभावात वाढ झाली आहे. त्याचा बाजारभाव ४,००० वरून ७,००० वर (क्विंटल) गेला आहे.या वाढीमुळे शेवगा उत्पादक शेतकऱ्यांना दिलासा मिळाला आहे. , मात्र टोमॅटो, बटाटे यांसारख्या इतर भाज्यांचे दर घसरले आहेत. तर गवारीला उच्चांकी १७ हजार रुपये प्रति क्विंटल दर मिळाला आहे. मात्र तरकारी मालाची बाजारातील आवक घटली आहे.
पितृपंधरवड्यात कोथिंबीर, मेथी, वांगे, भेंडी, कोबी, कांदा, बटाटे यांसारख्या भाज्यांची मागणी वाढली आहे. बाजारात एकूण ९४२.२० क्विंटल आवक झाली असून, सर्वाधिक आवक बटाट्याची ३४० क्विंटल, लसणाची १०० क्विंटल, कोथिंबिरीची ७० क्विंटल, पालकाची ४० क्विंटल आणि मेथीची ३७ क्विंटल नोंदवली गेली. टोमॅटोचे दर १,३०० वरून १,००० वर (क्विंटल) आले असून, २३ टक्के घसरण झाली आहे. बटाट्याचे दर १,८०० वरून १,५०० वर (क्विंटल) घसरले असून, १७ टक्के कमी झाले आहेत. कोबीचे दर ८०० वरून १,००० वर (बॅग) गेले असून, २५ टक्के वाढ झाली आहे. भेंडी आणि वांग्याचे दर २,५०० वरून ३,००० वर (क्विंटल) गेले असून, दोन्हींमध्ये २० टक्के वाढ झाली आहे. पावसामुळे उत्पादनावर परिणाम झाला असला तरी मागणीमुळे शेवगा आणि काही भाज्यांना चांगले दर मिळाले आहेत.