काटेवाडी, ता. १६ : बारामती कृषी उत्पन्न बाजार समितीच्या लिलाव बाजारात पिवळ्या मूगासह काळ्या उडदाने उच्चांकी बाजारभाव गाठला असून, काळ्या उडदाला ७,३६० रुपये प्रतिक्विंटल आणि हिरव्या मूगाला ८,००० रुपये प्रतिक्विंटल दर मिळाला. पिवळ्या मूगाला ९,५०० रुपये प्रतिक्विंटल असा उच्चांकी भाव मिळाला. तर मंगळवारी (ता. १६ ) गूळ-बॉक्स आणि तेलबियांचे लिलाव पार पडले यामध्ये सूर्यफूलाला ६,२०१ रुपये प्रतिक्विंटल असा उच्चांकी भाव मिळाला.

तांबडी मका, गावरान ज्वारी, हायब्रीड ज्वारी आणि बाजरीच्या दरांमध्ये स्थिरता दिसून आली. काळ्या उडदाची सोमवारी (ता. १५) सर्वाधिक २२७ क्विंटल आवक नोंदवली गेली. गूळ-बॉक्सची ८३ क्विंटल आवक झाली. एकूण ९७३.४० क्विंटल धान्याची आवक झाली तर गूळ आणि तेलबियांची १३९.८० क्विंटल आवक नोंदली गेली. क्विंटलमधील आवक : लोकवन गहू (११४), हायब्रीड ज्वारी (९१), हायब्रीड बाजरी (७०), गावरान ज्वारी (६१), महिको बाजरी (४६), स्थानिक खपली (३२), तांबडी मका (३१), हिरवा मूग (१४), गरडा हरभरा (१२), घेवडा (९), जाडा हरभरा (७), तांबडी तूर (३) आणि पिवळा मूग (१) यांचा समावेश होता. गूळ-बॉक्स (८३ क्विंटल), पिवळा सोयाबीन (३६ क्विंटल), स्थानिक भुईमूग-शेंगा (१० क्विंटल) आणि स्थानिक सूर्यफूल (९ क्विंटल) यांची आवक झाली.०