खुटबाव, ता. ३० : भांडगाव (ता. दौंड ) येथील ऑलम्पस स्कूलमध्ये क्रीडा व युवक संचालनालय व जिल्हा क्रीडा अधिकारी कार्यालय पुणे आयोजित तालुकास्तरीय बुद्धिबळ स्पर्धेत २१५ विद्यार्थ्यांनी सहभाग घेतला. यावेळी पुणे जिल्हा बुद्धिबळ संघटनेचे सचिव राजेंद्र कोंडे म्हणाले की, ‘‘विद्यार्थ्यांना बुद्धिबळ खेळातून एकाग्रता, संयम आणि युक्तीने निर्णय घेण्याचे कसब प्राप्त होते. तसेच विद्यार्थ्यांमध्ये विचारशक्ती, तार्किकता व आत्मविश्वास वृद्धिंगत होण्यास मदत होते. ऑलम्पस स्कूलने दिमाखदार व दर्जेदार स्पर्धेचे आयोजन केले आहे.’’ यावेळी राष्ट्रवादी तालुकाध्यक्ष नितीन दोरगे, अरविंद कांचन, राष्ट्रीय पंच जयवंत पिंगळे, जयश्री पिंगळे, सुनिल माने, शाळेच्या संचालिका भक्ती शेवाळे, प्राचार्या विद्या चौहान, प्रा. श्रीकृष्ण थेटे उपस्थित होते.
या स्पर्धेत १४ वर्षाखालील मुले व मुली गटामध्ये शार्दुल मोरे व श्रावणी कालखैरे यांनी, १७ वर्षाखालील मुले व मुली गटामध्ये श्रीतेज मोरे व समृद्धी वालंडे यांनी, १९ वर्षाखालील मुले व मुली गटामध्ये शिवराज चांदेकर व अमृता मोहिते यांनी प्रथम क्रमांक पटकावला.