कुरकुंभ, ता. २२ : कुरकुंभ (ता. दौंड) येथील मनाली दयानंद कानडे हिची भारतीय सीमा सुरक्षा दलात (बीएसएफ) निवड झाली. येथील जेपी लॅब कंपनीमध्ये कार्यरत असलेले दयानंद कानडे हे तिचे पिता होत. पुणे येथील सीआरपीएफ ग्राउंडवर पार पडलेल्या बीएसएफ भरती प्रक्रियेत मनालीने लेखी परीक्षा, मैदानी चाचण्या, धावणे तसेच इतर शारीरिक चाचण्यांमध्ये उत्कृष्ट कामगिरी केली. तिच्या या कामगिरीची दखल घेत बीएसएफकडून तिची निवड अधिकृतपणे जाहीर करण्यात आली. मनालीची निवड झाल्याबद्दल कुरकुंभ परिसरात तसेच समाजातील सर्व स्तरांतून तिचे अभिनंदन करण्यात येत आहे. या निवडीनंतर मनालीला नवी दिल्ली येथे प्रशिक्षणासाठी पाठविण्यात येणार आहे. या यशाबद्दल बोलताना मनाली म्हणाली की, ‘‘या निवडीमागे माझे परिश्रम आणि आत्मविश्वास असून, या संपूर्ण प्रवासात आई-वडिलांचे मोलाचे मार्गदर्शन आणि प्रेरणा मिळाली.’’