लोणी देवकर, ता. ७ ः पुणे- सोलापूर महामार्गावरील वरकुटे पाटी (ता. इंदापूर) येथील उड्डाणपुलावर रस्त्यावरच्या पांढऱ्या पट्ट्या नसल्याने अपघात होत आहेत. याबाबत महामार्ग प्राधिकरणाने तत्काळ कार्यवाही करण्याची गरज व्यक्त केली जात आहे.
याबाबत अधिक माहिती अशी की, पुणे- सोलापूर महामार्गावरील वरकुटे पाटी येथे वारंवार होत असलेल्या अपघातामुळे नव्याने उड्डाण पुलाची निर्मिती करण्यात आली. जवळपास उड्डाणपुलाचे काम पूर्णत्वास आलेले असताना अद्यापही मार्गावर पांढऱ्या पट्ट्या मारण्यात आलेल्या नाहीत. याचा परिणाम वाहन चालकांना वाहन चालवत असताना वारंवार अडचणी निर्माण होत आहेत. पुलावरील रस्त्याचा अंदाज न आल्याने प्रवासादरम्यान रात्रीच्या वेळी तर वारंवार छोटे मोठे अपघात होत आहेत.
महामार्गाचे चौपदरीकरण करण्यात आल्याने वाहने अति वेगाने धावत आहे. सुसाट धावणाऱ्या वाहनांसाठी मार्गावर योग्य पांढऱ्या पट्ट्या मारणे आवश्यक आहे. मात्र, महामार्ग प्राधिकरणाकडून याकडे दुर्लक्ष केले जात आहे. रस्त्याचा अंदाज येत नसल्यामुळे जीव मुठीत घेऊन वाहन चालकांना प्रवास करावा लागत आहे. याबाबत तत्काळ उपाययोजना करून पांढऱ्या पट्ट्या मारण्याची मागणी वाहनचालकांमधून होत आहे.

रस्त्याच्या पोटचाऱ्यांची कामे अपूर्ण
उड्डाणपुलाच्या अलीकडे व पुढे सेवा रस्त्याच्या बाजूला असलेल्या पोट चाऱ्यांची कामे अपूर्ण असल्याने, तसेच पोटचारी भोवती संरक्षक कठडे उभा न केल्याने रात्रीच्या वेळी वाहने या पोटचाऱ्यांमध्ये जाऊन अपघात घडण्याची शक्यता आहे. यामुळे पोटचाऱ्यांची कामे पूर्ण करून संरक्षक कठडे उभा करण्याची आवश्यकता आहे.