लोणीदेवकर, ता. १२ : इंदापूर तालुक्यामध्ये चोऱ्यांचे प्रमाण दिवसेंदिवस वाढत आहे. यातच कालठणमध्ये दोन दिवसांपूर्वी चोरी होत सात लाखांचा ऐवज चोरीला गेला होता. रात्रीच्या वेळी झालेल्या या चोरीमुळे परिसरात भीतीचे वातावरण आहे. वाढत्या चोरांच्या पार्श्‍वभूमीवर कालठण नं. १ च्या ग्रामस्थांकडून गावातील मुख्य रस्ते आणि चौकांमध्ये सीसीटीव्ही बसवण्याची मागणी केली जात आहे.
उजनी परिसरामध्ये गेल्या महिनाभरामध्ये छोट्या मोठ्या चोऱ्यांचे प्रमाण वाढले आहे. काही दिवसांपूर्वी लोणी देवकर मध्ये दिवसा चोरी झाली होती. त्यातच आता कालठण नं. १ येथे मध्यरात्री चोरी होत ज्याच्यामध्ये मोठा ऐवज चोरीला गेला. उजनी परिसरामध्ये बहुतांश ग्रामस्थ हे शेतीची कामे करतात. कामानिमित्त दिवसभर शेतात असतात. गावातील घरी अनेक दिवसा कोणीही व्यक्ती नसते. त्यातच अलीकडच्या काळामध्ये गावांमध्ये अनोळखी व्यक्तींचा वावर देखील वाढल्याचे आहेत. या सर्व बाबीकडे गांभीर्याने लक्ष देत गावातील मुख्य चौकासह प्रमुख ठिकाणी सीसीटीव्ही बसवणे आवश्यक आहे.
गावामध्ये प्रशासक असून ग्रामपंचायतीचा मागील दोन वर्षापासून कारभार प्रशासका मार्फत चालवला जातो आहे. प्रशासनाने या विषयाकडे गांभीर्याने लक्ष देत लवकरात लवकर सीसीटीव्ही बसवणे गरजेचे असल्याचे हनुमंत पांडुळे, काकासाहेब मांढरे, दत्तात्रेय गायकवाड व श्रीकांत पवार मागणी यांनी केली आहे.