लोणी देवकर, ता.६ : लोणी देवकर (ता. इंदापूर) परिसरात बुधवार (ता.६) सकाळपासून हलका ते मध्यम स्वरूपाचा पाऊस सुरू झाला. पळसदेव, लोणी देवकर, भावडी, चांडगाव, वरकुटे बुद्रुक, अगोती, कालठण, गंगावळण परिसरात बऱ्याच दिवसांनंतर पाऊस सुरू झाल्याने शेतकऱ्यांकडून समाधान व्यक्त करण्यात आले. सकाळच्या प्रहरी आलेल्या पावसामुळे कांदा उत्पादक शेतकऱ्यांसह ग्रामस्थांची काहींची धांदल उडाली.
दोन दिवसांपासून हवेमध्ये उकाडा जाणवत होता. सकाळपासूनच ढगाळ वातावरण होते. त्यातच सकाळी संततधार पावसाला सुरुवात झाली. काही ठिकाणी हलक्या तर काही ठिकाणी मध्यम प्रमाणात पाऊस पडला. पावसामुळे परिसरातील काही ठिकाणी सखल भागांमध्ये पाणी साचले. मोठा पाऊस पडला नसला तरी संततधार पाऊस पडल्यामुळे ठिकठिकाणी शेतकऱ्यांची धावपळ झाली. कांदा उत्पादक शेतकऱ्यांची कांदा झाकण्यासाठी धावपळ झाली तर फळबागा उत्पादकांना पिकाच्या संरक्षणासाठी धावाधाव करावी लागल्याचे ठिकठिकाणी दिसून आले. मात्र, दुपारनंतर वातावरण पूर्ववत सर्वत्र ऊन पडले.